Оралда ұлттық теңге күніне орай көрме ашылды

АЛ. 14 қараша. ҚазАқпарат /Елжан Ералы/ - 15 қараша - ұлттық теңге күніне және ел тәуелсіздігінің 20 жыл­дығына орай Жәңгір хан атындағы Батыс Қазақстан аграрлық-техникалық университетінің тарихи-этнографиялық мұражайында «Тәуелсіздік­тің алтын қазығы - теңге» атты көрме ашылды.

Ел тәуелсіздігінің бұл­­жытпас белгісі - оның төл ақшасы. Биыл ұлттық тең­генің өмірге келгеніне 18 жыл толмақ. Жалпы теңге - ұлттық тарихымыз са­бақ­тастығының да айқын кө­рінісі. Өйткені қыпшақтың Алтын Ор­да мемлекетінің де, Еділ мен Жайықтың ортасындағы Но­ғай Ордасының да, шамамен 1456 жылы құрылған Қазақ хан­дығының да төл ақшасы - тең­ге болған. Мұның өзі «Қазақта өркениет болмаған» деген кейбір ғалымдардың пайымдауын жоққа шығарады. Сондықтан ақша көрмесіндегі Ноғай Ордасының астанасы - Сарайшық қаласынан табыл­ған теңге келушілердің наза­рын бірден өзіне тартты. Аталған аса бағалы жәдігерлікті об­лыстық мәслихаттың депутаты, кәсіпкер Мұрат Жәкібаев мұражай директоры Нұржан Төлеповке сыйға тартыпты. Жалпы, осы көрменің ұйым­дас­тырылуына облыстық та­ри­хи-өлкетану мұражайы мен Қазақстан Республикасының Ұлттық банкінің облыстық филиалы мол үлес қосты. Те­ң­генің орта ғасырдан бастап, бүгінгі күнге дейінгі даму жолынан толыққанды мәліметтер беретін монеталар, қағаз ақша­лар және басқалары облыстық мұражай мен осы жоғары оқу орнының доценті Рахметолла Құсайыновтың жеке қорынан алынған. Ұлттық банк филиалы ұсынған тақырыпқа байланысты буклеттер мен кітаптар да осында. Әсіресе, қазір аса сирек кездесетін «Нумизматика (ақша туралы ғылым) мен эпиграфия» атты орыс тіліндегі кітаптың жекелеген томдарын тамашалауға да мүмкіндік бар. Н.Төлепов­­тің бастамасымен шығарылған төл теңгеміздің халықаралық таң­басы және Ұлттық Банктің, монета сарайы мен банкнот шығару фабрикасының белгілері, әр жылы шыққан ұлттық ақшамыздың кескіндері бейнеленген буклет ерекше тартым­ды. Басқа да қойылған жәдігер­лер келушілер назарын аударады.

Көрменің ашылу рәсімінде БҚАТУ-дың экономика факуль­те­тінің деканы Раушан Ғабду­ә­лиева, ҚР Ұлттық банкі облыстық филиалының директоры Борис Ізбасаров, еңбек ардагері, оқы­тушы Сағындық Бисенов теңгенің тарихы мен бүгінгісіне шолу жасады, еліміздегі ақша қатынастарына қатысты пайым­дауларымен бө­лісті. Б.Із­ба­саров өзара ынтымақты қарым-қатынастары үшін БҚАТУ-дың ректоры Қазыбай Бозымовқа арналған алғысхаты мен ұлт­тық теңгенің 15 жылды­ғына орай шығарылған қалың кітапты мұражай директоры Нұржан Төлеповке салтанатты түрде табыс етті.

Көрме жұмысы 21 желтоқсанға дейін жалғаспақ.