Оралда Ұлттық ұлан ширек ғасырлық тойын атап өтті
«Батыс» өңірлік қолбасшылығының баспасөз қызметінен түскен мәліметке қарағанда, аталмыш әскери бөлім тарихы 1992 жылы 25 ақпанда Орал дербес арнайы моторландырылған милиция батальонының құрылуынан басталды.
Салтанатты шарада «Батыс» өңірлік қолбасшысы, генерал-майор Әлібек Сералиевтің мәлім еткеніндей, ҚР Президенті, Жоғарғы Бас қолбасшы Нұрсұлтан Назарбаев ел әскерлерінің қазіргі заманғы талаптарға сай қызмет етуіне ұдайы көңіл бөліп келеді. Ұлттық ұлан жауынгерлерінің міндеті қала көшелерінде қоғамдық тәртіпті қамтамасыз ету, Батыс өңірде құқықбұзушылықтың жолын кесіп, жаппай тәртіпсіздіктерге жол бермеу болып табылады. Осы орайда олар өз қызметтерін барынша абыроймен атқаруда.
Бұдан кейін «Батыс» өңірлік қолбасшылығы тәрбие және әлеуметтік-құқықтық жұмыстар басқармасының бастығы, подполковник Әлішер Әбдірасыл баяндама жасап, 5515-әскери бөлімінің құрылу тарихына, қалыптасу жылдарына тоқталды.
Шара барысында бір топ әскери қызметкерлер мен ардагерлер грамота, бағалы сыйлықтармен марапатталып, сондай-ақ ҚР құқық тәртібі әскерлері құрылуының 25 жылдығына арналған медальдар табыс етілді.
«Батыс» қолбасшылығы ардагерлер кеңесінің төрағасы, доғарыстағы подполковник Бақытжан Бердиев осынау ширек ғасыр ішінде өз қызметтерін мінсіз атқарған көптеген жауынгерлердің алды мемлекеттік орден, медальдармен марапатталғанын жеткізді.
Шара соңы 5517-әскери бөлім оркестрі қойған мерекелік концертке ұласты.