Орман өрті Түркияны шарпыды: ондаған елді мекен эвакуацияланды
АСТАНА. KAZINFORM – Түркияның солтүстік-батысында ауқымды орман өрттері басталды. Бірнеше күннің ішінде 150-ден астам өрт шығып, жүздеген адам қауіпсіз жерге көшірілді, деп хабарлайды Kazinform тілшісі.
Ауыл шаруашылығы және орман шаруашылығы министрі Ибрагим Юмаклидің айтуынша, Түркияда кейінгі бірнеше күнде орман өрттері жаппай көбейген. Елде 153 өрт тіркелді, оның 83-і кеше болған. Қазіргі уақытта сегіз белсенді өртті сөндіру жұмыстары жүргізілуде, оның төртеуі жартылай ауыздықталды.
Әсіресе солтүстік-батыс Сакария мен Билежик провинциялары қатты зардап шекті. Бұл аймақтарда 16 елді мекен көшірілді – екеуі Сакарияда және 14-і Билежикте. Юмаклидің айтуынша, эвакуациялау шаралары азаматтардың қауіпсіздігін қамтамасыз ету және өртке қарсы қызметтердің жұмысын жеңілдету үшін жылдам жүргізілді.
Осыған орай түрік министрі осындай ауқымды өрттердің шығу себептеріне қатысты қызметтік тергеу басталғанын хабарлады. Алдын ала тергеу аясында 17 адам ұсталды. Олардың ықтимал қатысының мән-жайы анықталып жатыр.
Оқиға орнынан түсірілген кадрлар қираудың ауқымын көрсетеді: өртенген ормандар, өртенген үйлер және аспанды күңгірттенген түтін. Жүздеген адам өмірлері мен мүлкіне қауіп төніп, үйлерін тастап кетуге мәжбүр болды.
Азаматтық қорғаныс қызметтері, өрт сөндірушілер мен еріктілер күрделі ауа райы жағдайларына және жалынның тез таралуына ықпал ететін күшті желге қарамастан өртті сөндіруді жалғастыруда. Билік азаматтарды сабырлық сақтауға, қауіпсіздік шараларын сақтауға және ресми хабарламаларды орындауға шақырды.
Жағдай алдағы күндері шиеленісе түседі деп күтіліп отыр. Түрік билігі өртті сөндіру және жаңа ошақтардың алдын алу үшін ұшақтарды, арнайы техника мен қосымша күштерді жұмылдырды.
Еске сала кетейік, бұған дейін Түркиядағы демалыс орнында тағы да қонақүй өртенгенін жазған едік.
