Өртенген үйден әйелді алып шыққан полицей марапатталды - Қостанай
Жанат Меңдіғалиев – бүгінгі күннің батыры. Ол осы жылдың 29 қаңтарында екі адамды өртеніп жатқан үйден алып шықты. Отан қорғаушылар мерекесі қарсаңында тәртіп сақшысына құрмет көрсетіліп, Қазақстан Республикасының мемлекеттік наградасы – «Ерлігі үшін» медалі тапсырылды.
Қазір полицей шалғай ауылдарда карантиндік іс-шаралардың іске асырылуын қамтамасыз етіп жүр. Жанат Меңдіғалиевті ұялы телефон арқылы құттықтап, ерлік ісін тағы бір еске түсірдік.
«Оқиға 29 қаңтар күні сағат 23.30 шамасында болды. Бейімбет Майлин ауданы Әйет ауылында патрульдеп жүргенбіз. Жабағы батыр көшесіндегі жеке үйлердің бірінен өрт шыққаны туралы хабар түсті. Оқиға орнына әріптесім Сергей Чекин екеуміз бардық. Аулада жүрген көршілер үй ішінде адамдардың қалып қойғанын айтты. Өрттен үй иесінің уланып қалғанын көрдім. Ойлануға мұрша жоқ. Жалын аз уақытта үйді алып кетті. Дереу үйге кіріп, адамдарды іздестіре бастадым. Бөлмелердің бірінен ессіз күйде жатқан адамды көрдім. Бар ойым әйелді тезірек сыртқа шығару болды», - дейді полицей сол күні еске түсіріп.
Осылайша, Жанат Меңдіғалиевтің қырағылығының арқасында 54 жастағы әйел мен оның 52 жастағы інісі, өртенген үйдің иесі аман қалды. Полицейлер оларды бірден аудандық ауруханаға алып барды. Дәрігерлер екеуінің де ыстан уланғанын айтты.
Ерлік жасаған Жанат Меңдіғалиев – Бейімбет Майлин ауданы полиция басқармасының учаскелік полиция инспекторы. Ол бала кезінен құқық қорғау саласында қызмет етуді армандаған.
«Бала кезімнен полицей болғым келді. Адамдарға көмек көрсету ұнайтын. Спортқа да жақын болдым. Арманым орындалып, Ш. Қабылбаев атындағы Қостанай академиясына оқуға түстім. Оны сәтті аяқтаған соң,аудандық полиция бөліміне қызметке алындым. Кәсіби қызметте де халыққа көмек көрсетудің маңыздылығын түсіндім», - дейді полицей.
