Өскемен ғалымдары жасап шығарған титан импланттар кімдерге тегін беріледі

АСТАНА. KAZINFORM – Ғылым және жоғары білім министрі Саясат Нұрбек Үкімет отырысынан кейін өткен баспасөз мәслихатында титаннан жасалған отандық импланттар қандай науқастарға тегін берілетінін айтты.

- Бұл жерде бәрі заң бойынша жасалады. Мысалы, квота арқылы келген, әлеуметтік осал топтардан шыққан азаматтарға, тегін кепілдендірілген мемлекеттік медициналық көмек алатындарға тегіне беріледі. Қазір Өскеменде жекеменшік инвестормен бірге зауыт құрып жатырмыз. Өйткені университеттің ішкі инвестициясы (Д.Серікбаев атындағы Шығыс Қазақстан техникалық университет) жетпейді, - деді ол.

Министр бұйымдардың бағасы әлі есептелмегенін айтады.

- Инвесторлар медициналық компания құрып, бүкіл ауруханаларға сатады. Бірақ ол өте арзан болады. Неге десеңіз, титан өзіміздікі, кедендік алымдар да жоқ. Маркетингті әлі есептеген жоқ. Сондықтан нақты бағасын әлі айта алмаймын. Шетелдік баламаларынан кемінде бірнеше есе арзан болады, - деді ведомство басшысы.

Айта кетейік, бүгін министр Саясат Нұрбек Үкімет отырысынан кейін өткен баспасөз мәслихатында титаннан жасалған отандық импланттарды таныстырды.