Өскеменде Анатолий Балушкинге қатысты сот ісі басталды

ӨСКЕМЕН. KAZINFORM – Өскемен қаласында «БИПЭК АВТО – АЗИЯ АВТО» АҚ басшысы болған Анатолий Балушкинге қатысты сот ісі басталды.

Қалалық №2 сотының материалдарына сүйенсек, Анатолий Балушкинге және «АЗИЯ АВТО» компаниясының бас директоры Ерік Сағымбаевқа қатысты сот процесі басталды. Сотталушылар Қазақстанда болмағандықтан сот ісі сырттай өтіп жатыр.

Анатолий Балушкинге ҚР Қылмыстық Кодекстің 190-бабы 4-бөлігінің 2-тармағы (аса ірі мөлшердегі алаяқтық), 218-бабы 3 бөлігінің 3-тармағы (қылмыстық жолмен алынған ақшаны немесе өзге де мүлікті заңдастыру) бойынша айып тағылған. Ал Ерік Сағымбаев ҚК-нің 190-бабы 4-бөлігінің 2-тармағымен және 245-бабы 3-бөлігімен (салықтан жалтару) бойынша сотқа тартылып жатыр.

Адвокаттар айыпталушылардың Ресей азаматтары екенін айтып, істі сол елдің құзыретті органдарына жіберу туралы өтініш жасаған. Ал жәбірленуші тарап пен прокурорлар соттан олардың бұл өтінішін қанағаттандырмауды өтінген.

Еске сала кетсек, 2020 жылы ҚР Индустрия және инфрақұрылымдық даму министрлігі «БИПЭК АВТО – АЗИЯ АВТО» АҚ-ға қаншама жыл бойы мемлекет тарапынан қомақты қаржы бөлінгенімен оның өзіне жүктелген міндеттерді дұрыс орындамағанын мәлімдеген.

Осыдан соң аталған АҚ-ның негізгі акционері және директорлар кеңесінің төрағасы А.М.Балушкинді ҚР Қылмыстық кодексінің 190-бабы 4-бөлігінің 2-тармағына сәйкес, «қамау» түріндегі бұлтартпау шарасына санкция берілген.