Өскеменде белгілі спортшыны атып кеткен ер адамның жазасы қатаңдатылды

ӨСКЕМЕН. KAZINFORM – Өскемен қаласында апелляциялық сот ережесіз жекпе-жектен халықаралық дәрежедегі спорт шебері Эльер Юнусметовті атып кеткен ер адамның жазасын қатаңдатты.

Оқиға осы жылдың 13 қаңтарында қаладағы Қазақстан көшесінде болған. ШҚО Полиция департаментінің мәліметінше, Эльер Юнусметовті белгісіз біреу подъез алдында шолақ мылтықпен атып кеткен. Тәртіп сақшылары көп ұзамай күдіктіні Абай даңғылында келе жатқан жерінен ұстады.

Шығыс Қазақстан облысының қылмыстық істер жөніндегі мамандандырылған ауданаралық соты айыпталушыны ҚР ҚК-нің 99-бабымен (Адам өлтіру) кінәлі деп танып, 13 жылға бас бостандығынан айырған болатын. Алайда жәбірленуші тарап бұл үкіммен келіспей, облыстық сотқа шағым түсірген.

«Істі қараған апелляциялық сот үкімді қатаңдату жайлы шешім қабылдады. Белгілі болғандай, сотталушы бұрын ауыр қылмыс жасағаны үшін сотты болған және ол спортшыны пробациялық бақылауда болған кезінде өлтірген», - деп хабарлады облыстық соттан.

Айыпталушының жазасы тағы 3 жылға ұзартылды. Осылайша, ол 16 жылға бас бостандығынан айырылды.

Еске салсақ, бұған дейін Өскеменде белгілі спортшыны атып кеткен ер адамның 13 жылға түрмеге қамалғанын жазған едік.