Өскеменде бейнебақылау камераларының арқасында 5 мыңнан астам құқықбұзушылық анықталды

ӨСКЕМЕН. ҚазАқпарат - Өскеменде ағымдағы жылдың басынан Жедел басқару орталығының камераларының көмегімен 5 мыңнан астам әкімшілік құқықбұзушылық анықталды. Олардың қатарында ұсақ бұзақылық, жолда жүру ережесін бұзу, қоғамдық орындарда ішімдік ішу, қала көшелерін ластау сияқты тәртіп бұзушылықтар бар.

Бейнекамералар арқылы 72 қылмыстың беті ашылды: 58 бұзақылық, 4 тонау, 1 ұрлық және өзге де құқықбұзушылықтар.

Мәселен, 16 шілдеде, түнгі сағат 3-те Крылов көшесінің бойында екі адам «Ваз 2106» көлігін айдап әкетпек болған. Бейнебақылау камералары жол-патрульдік полиция қызметкерлеріне қылмысты жасамақ болған 21 жастағы қала тұрғындарын ұстауға көмектесті. Көлікті айдап әкетпек болғаны үшін олар қылмыстық жауапкершілікке тартылды, деп хабарлады облыстық ІІД.