Өскеменде өртенген жер үйден ер адамның денесі табылды

ӨСКЕМЕН. KAZINFORM – Өскемен қаласында отқа оранған жер үйден ер адамның мәйіті табылды.

ШҚО төтенше жағдайлар департаменті баспасөз қызметінің мәліметіне сүйенсек, өрт қаладағы Черняховский көшесіндегі үйден шыққан.

- Оқиға орнына құтқарушылар шұғыл келіп жетті. Жер үйдегі бөлмелердің бірінен 1970 жылғы ер адамның денесі табылды. Көп ұзамай қызыл жалын толықтай ауыздықталды, - деп хабарлады ведомство өкілдері.

Өрттің жалпы аумағы 44 шаршы метр. Әзірге оттың нақты неден шыққаны белгісіз. Қазіргі уақытта оқиғаның мән-жайы анықталып жатыр.

Осы ретте, құтқарушылар өңір жұртшылығына үйде өрт қауіпсіздігі талаптарын қатаң сақтауға шақырды.

Еске салсақ, осыған дейін ТЖМ құтқарушылары орманды алапат өрттен қорғап қалғаны хабарланған.