Өскеменде тұрғындар шағымынан соң көктайғақ кезінде себілетін қоспа сапасы тексерілді
ШҚО Экология департаменті баспасөз қызметінің мәліметіне сүйенсек, «Таза Өскемен» кәсіпорнының көшеге көктайғаққа қарсы шашатын қоспасына тексеру жүргізілді.
Анықталғандай, олар техникалық тұз бен құмды қосып пайдаланған. Экологиялық кодекстің 238-бабына сәйкес, тыйым тек ас тұзына қатысты салынған. Оның үстіне бұл тұз техникалық тұзға қарағанда қымбатырақ. Сондықтан Өскеменде көшеге ас тұзын септі деген қисынға да келмейді.
«С.Аманжолов атындағы ШҚУ-дың зертханасында жүргізілген сынақтардың нәтижесі көрсеткендей, коммуналдық мекеме қолданған тұзда натрий хлоридінің массалық үлесі 95,84 пайызды құрады. Демек, кәсіпорынның көктайғаққа қарсы материал дайындауға пайдаланатын тұзы – техникалық», - делінген ақпаратта.
Еске салсақ, осыған дейін әлеуметтік желіде Өскемен тұрғындарының шағымы тарағанын, онда коммуналдық қызметтердің қала көшелеріне шашатын реагенттерінен аяқ киім мен көлік дөңгелегі бүлініп жатқаны жазылғанын хабарлаған едік.