Осы уақытта Батыс Қазақстанда 1266 түлек ҰБТ тапсыруда
Облыстық білім басқармасы мектепке дейінгі және орта білімді дамыту бөлімінің басшысы Зәуре Ғұмарованың айтуынша, бүгін Ақсай қаласында Бөрлі мен Шыңғырлау аудандарының түлектері сынақ тапсыруда.
Сондай-ақ Орал қаласындағы М.Өтемісұлы атындағы Батыс Қазақстан мемлекеттік университетіндегі ҰБТ пунктінде қалалық және облыстық мектептердің, Зеленов ауданы, Жәңгір хан атындағы Батыс Қазақстан аграрлық-техникалық университетінде облыстық мектептердің, Тасқала мен Теректі аудандарының түлектері сыннан өтуде. Бүгін 1281 жас ҰБТ тапсыруы керек болса, соның 1266-сы дәрісханаға кірді. Ертең қала мен басқа аудандарда сынақ жалғасады.
Облыс бойынша биыл барлығы 5384 түлек мектеп бітіреді, соның 3923-і ҰБТ-ға қатысуға тілек білдірді. «Алтын белгіге» 211 түлек қол созса, 123-і «Ерекше аттестаттан» үмітті. Сонымен қатар халықаралық олимпиадалардың 23 жүлдегері ҰБТ-дан босатылды. Дегенмен, олардың екеуі «Алтын белгіні» алуы үшін сынаққа қатысады.