Отандық тауарлардың сауда желілеріндегі үлесі қандай

АСТАНА. KAZINFORM — Қазіргі кезде еліміздегі дүкен сөрелеріндегі азық-түліктің неше пайызы отандық өндірушілерге тиесілі болуы керек? Осы сұраққа ҚР Сауда және интеграция министрлігі жауап берді.

- Министрлік отандық тауарлардың сауда желілерінің сөрелеріне еркін шығуын қамтамасыз ету бойынша тұрақты жұмысты атқарып келеді. Мониторинг нәтижелері республика бойынша отандық өндіріс тауарларының жеткілікті әрі жоғары деңгейде ұсынылуын көрсетті. Мысалы, отандық өнім ұсынудың орташа көрсеткіші айран бойынша 100%, ұн – 95%, сары май – 88%, сүт бойынша – 87%, тауық еті – 80%, күнбағыс майы – 63%, ал шұжық өнімдері бойынша 58 пайызды құрады, - делінген министрліктің Kazinform агенттігіне берген жауабында.

Ішкі сауда қағидаларына сәйкес, сауда желілері мен базарлардың сөрелерінде отандық тауар өндірушілерге тиеселі азық-түлік тауарларының кемінде 30 пайызын орналастыру ескерілген. Бұл тауарларды адамдарға жақсы көрінетін сөрелерде орналастыруға басымдық беріледі.

- Мемлекеттік қолдауды алған жағдайда, отандық азық-түлік тауарларын сөрелерге орналастыру бойынша сауда объектілерінің 50 пайызға дейін (Ішкі сауда қағидалары аясында 30% + мемлекеттік қолдау қағидалары аясында 20%) және азық-түлік емес тауарларды отандық тауар өндірушілер кем дегенде 20% орналастыру бойынша қарсы міндеттемелері көзделген, - деп аталып өткен ведомство ақпаратында.

Еске салсақ, жақында Сауда және интеграция министрлігінің кеңейтілген алқа мәжілісінде ведомство басшысы Арман Шаққалиев айтты сөрелердің кемінде 50 пайызы қазақстандық азық-түлік өнімдерімен толтырылуы тиіс екенін айтты.

Тауарларға белгіленген шекті үстеме бағаны асырып қойғаны үшін былтыр көше бойындағы және үй жанындағы дүкендерге 4,3 мың әкімшілік қаулы шығарылды.