Отбасынан – ұлттың тамырына: Көкшетауда Халықаралық отбасы күні кең көлемде аталып өтті
КӨКШЕТАУ. KAZINFORM – 15 мамыр – Халықаралық отбасы күніне орай Көкшетауда ерекше мәні бар «Отбасы ағашы» атты облыстық акция өтті.
Бұл шара — отбасы құндылықтарына бейжай қарамайтын жандарды біріктіріп, «Мерейлі отбасы–2025» ұлттық байқауының жаңа кезеңіне символдық бастау берді. Акцияға бұрынғы жеңімпаз және қатысушы отбасылар, қоғамдық ұйымдардың өкілдері, ата-аналар мен балалар қатысты. Олар бірлесе отырып «отбасы ағашын» отырғызып, түрлі байқауларға қатысып, шабыт сыйлайтын өмірлік оқиғаларымен бөлісті.
Шараның ашылу салтанатында Ақмола облыстық ішкі саясат басқармасы басшысының орынбасары Сабырхан Кенжебаев сөз сөйлеп,мерекемен құттықтады.
«Отбасы – әр адамның тірегі, махаббат пен рухани қуаттың бастауы. Бүгін осында жиналған барлық отбасыға алғыс айтамын. Біз тек бір символдық ағаш отырғызып қоймай, үлкен бір ізгі бастаманың жалғасын бастадық. ‘Мерейлі отбасы’ — бұл қазақ отбасының ең жақсы қырларын танытатын маңызды алаң. Осындай байқаулар – қоғамға дұрыс бағыт сілтейтін бағдаршам», – деді ол.
Сабырхан Кенжебаевтың айтуынша, Ақмола облысында жыл сайын ондаған отбасы байқауға қатысады. Аудандық және қалалық кезең жеңімпаздары республикалық деңгейде өңір намысын қорғауға мүмкіндік алады. Жергілікті деңгейде өтінім қабылдау 15 мамырдан 15 маусымға дейін, ал облыстық комиссия 15 шілдеге дейін құжаттарды қарастырады.
Өткен жылғы байқаудың ең жарқын қатысушыларының бірі — көкшетаулық Көңбай отбасы. Бұл әулет бірнеше ұрпақтың ынтымағы мен еңбегі арқылы нағыз отбасы дәстүрінің үлгісін көрсетіп отыр.
«Біз – үлкен әулетпіз. Әке-шешем он бала өсіріп тәрбиеледі, қазір 35 немере, 46 шөбере бар. Өткен жылы ‘Мерейлі отбасы’ байқауында облыстық кезеңнің Гран-при иегері болдық. Бұл — үлкен мәртебе. Осы байқауға қатысатын жаңа үміткерлерге сәттілік тілеймін. Себебі мықты мемлекет – мықты отбасыдан басталады», – деді театр және кино актері, ҚР еңбек сіңірген мәдениет қайраткері Төлеубек Көңбай.
Шарада өңірдегі қоғамдық ұйымдардың өкілдері де отбасы құндылықтарының маңыздылығына ерекше тоқталды. Ақмола облыстық Әкелер одағының төрағасы Нұршәріп Сандықбек:
«Отбасы – бұл кішкентай мемлекет. Біз ел боламыз десек, отбасында еңбекке, ата-анаға құрметке, сүйіспеншілікке баулуды үйретуіміз керек. Әкелер одағы 2018 жылдан бері жұмыс істейді. Осындай шаралар – болашақ азаматтардың қалыптасуына ықпал ететін маңызды бастамалар. Әр әке – тірек, әр ана – шабыт көзі болсын», – деді.
Ал облыстық мәслихат депутаты, «Ана үйі» жобасының үйлестірушісі және қамқор ана Құралай Жұмабекова отбасындағы тәрбиенің баланың тұлға ретінде қалыптасуына тікелей әсер ететінін атап өтті.
«Бүгінгі шарада көпбалалы, бақытты, рухы биік отбасыларды көру қуантады. Ата-ана – баланың алғашқы ұстазы. Оның өмірге деген көзқарасы, құндылықтары – отбасынан бастау алады. Махаббатты, мейірімді, құрметті сақтай білейік. Бұл – ең құнды мұрамыз», – деді ол.
Ресми бөлімнен кейін «Менің жанұям» атты тренинг пен отбасылық байқау ұйымдастырылды. Қатысушылар отбасылық дәстүрлерімен бөлісіп, күнделікті өмір мен мерекелік сәттерін әңгімелеп, бақытты өмірдің формулаларын ұсынды. Бұл жерде жеңілгендер болған жоқ — әрбір отбасы қошеметке, қолдауға және құрметке ие болды.
Ұйымдастырушылардың пікірінше, мұндай шаралар мерекелік күнтізбені әрлеп қана қоймай, отбасы институтын нығайтуға бағытталған мемлекеттік саясаттың маңызды бөлігіне айналуда.
Парк «Бәйтерек» аллеясында алғашқы «отбасы ағаштары» бүр жарып үлгерсе, «Мерейлі отбасы–2025» байқауы жаңа бастау алды. Мүмкін, келесі жылы тағы бір отбасының тарихы күллі елге үлгі болар.
Айта кетейік, Астанада Жеңістің 80 жылдығына орай «Даңқ аллеясына» ағаш отырғызылды.
