Өткен аптада жемқорлыққа қатысты 12 лауазымды тұлға ұсталды
НҰР-СҰЛТАН. ҚазАқпарат - Өткен аптада Сыбайлас жемқорлыққа қарсы қызмет 80-нен астам сотқа дейінгі тергеуді тіркеді. Бұл туралы AntikorNews бағдарламасында айтылды, деп хабарлайды ҚазАқпарат тілшісі.
«12 лауазымды тұлға ұсталды, 10 тұлғаға қатысты «қамауда ұстау» түріндегі бұлтартпау шарасы қолданылды», - дейді ҚР Сыбайлас жемқорлыққа қарсы іс-қимыл агенттігі бірінші департаментінің аса маңызды істер жөніндегі тергеушісі Данияр Биғайдаров.
Сондай-ақ, Нұр-Сұлтан қаласының сыбайлас жемқорлыққа қарсы қызметі «Нұр-Сұлтан қаласының Қалалық орта сапасы және бақылау басқармасы» ММ-нің басшысы мен басқа да тұлғаларына қатысты сотқа дейінгі тергеуді бастады.
«Олар 100 000 теңгеден 1 000 000 теңгеге дейінгі ақшалай сыйақы үшін заңды тұлғаларға құрылыс-монтаждау жұмыстарымен айналысуға 1,2,3-санаттағы лицензияларды заңсыз беру бойынша құқыққа қарсы қылмыстық схеманы қолданды», - дейді ол.
