Өткен жылы Астанада 41 өзге ұлт өкілі ислам дінін қабылдады - ҚМДБ
Бұл туралы Қазақстан мұсылмандары діни басқармасы ұсынған өткен жылдың қорытынды есебінде айтылған.
ҚМДБ-ның баспасөз хатшысы Ағабек Қонарбайұлы ұсынған есептеулерге сүйенсек, 2012 жылы Алматы мешіттерінде жалпы саны 6384 бала діни сауат ашу курстарында ілім алды. Оның 3695-і - ұл бала, 2682-сі - қыз бала. Ал «Нұр Астана» мешітінің бас имамы Қалижан Заңқоев өткен жылы елордада 41 өзге дін өкілі Ислам дінін қабылдағанын мәлім еткен. Сондай-ақ ҚМДБ-ның Атырау облысындағы өкіл имамы Амантай Сәдиев сәләфилердің жетегінде жүрген 27 адамның өз райынан қайтқанын жеткізді. Ақмола облысында имамдардың қатысуымен жоғары оқу орындарында, мекемелерде, абақтыларда, қарттар және жетімдер үйлерінде 390 кездесулер ұйымдастырылып, уағыз-насихат айтылды. Қызылорда облысындағы мешіттер «Skype» жүйесіне қосылды. Өкіл имам Талғат Омаров басқа өңірлерде орнатылмаған жаңа технологияға негізделген тың жаңалықпен бөлісті. Оңтүстік Қазақстан облысында мешіт тарапынан тұрмысы төмен бас-аяғы 3045 отбасыға қайырымдылық көмек көрсетілді. Маңғыстау облыстық «Бекет ата» мешіті жергілікті әкімшіліктің қолдауымен Құрбан айт мерекесінде мешіт ауласына 7 киіз үй тігіп, 4 мың адамға тегін тамақ таратты.
Ал Бас мүфти Ә. Дербісәлінің айтуынша, еліміз бойынша 1500 ауылда мешіттер мүлдем жоқ. Мүфтият жылдағы игі дәстүрге сай өткен жылы 23 имамды Түркияға діни ілімдерін жетілдіруге жіберді. Биыл еліміздің ірі қалаларында орналасқан республикалық 9 медресе мен «Нұр» Қазақ-Египет ислам университетін тәмамдаған 250-ден астам дін кадрлары қызметке кіріспек. ҚМДБ-ның қарамағында қызмет ететін дін кадрларының 62 пайызы діни біліммен сусындаған. Бүгінде Қазақстан мұсылмандары діни басқармасында 13 дін кадрының ғылыми атағы бар. Оның 2-еуі ғылым докторлары һәм профессорлар, 1-еуі phD докторы. 2-еуі ғылым кандидаты. Қалған 8-і ғылым магистрлері.
Сонымен қатар, таратылған баспасөз хабарламасында мәлім етілгендей, осыған дейін Қазақстан аумағында Ислам құндылықтары жайлы 28 кітап пен кітапшалар шығарылды. Олар оқырман қауымға 600 мың данамен жол тартты.