Өткен жылы астаналық тұтынушылардан 4935 арыз түсті

АСТАНА. 14 наурыз. ҚазАқпарат - Өткен жылдың 9 айы ішінде «Әділет» тұтынушылар құқығын қорғау қоғамына қала тұрғындарынан 4975 арыз түскен. Ал 2011 жылдың 12 айындағы арыздар саны 4300 болған, яғни 2012 жылы 30 пайызға артты. Бұл туралы Астана қаласы әкімдігінде өткен дөңгелек үстелде «Әділет» тұтынушылар құқығын қорғау қоғамы төрағасының орынбасары Тұрсын Жағыпарова мәлім етті, деп жазады елорданың ресми сайты.

Т. Жағыпарованың айтуынша, тұтынушылардың құқығын қорғау қоғамына кәсіпкерлерге жаза тағайындау немесе айыппұл салу сияқты белгілі құзірет берілмеген. Қолдан келетіні тек сапасыз өнім шығаратын алаяқтарды немесе мерзімі өткен азық-түлік сататын дүкендерді анықтап, тиісті органға хат жазу. Ал тиісті мекеме 14 жұмыс күні ішінде хатқа жауап беруі тиіс.

«Осындай келеңсіздіктерді болдырмау мақсатында «Әділет» тұтынушылар құқығын қорғау қоғамы дөңгелек үстелге астаналық кәсіпкерлер мен бизнес өкілдерінің басын қосып, қоғамды жайлаған індетпен бірігіп күресуге шақырды. Бүгінгі таңда Қоғамға 13 адам мүше, олардың барлығы 20 жылдық тәжірибесі бар зейнеткерлер. Төленетін жалақының аздығынан жастар мұнда келіп жұмыс істеуге құлықсыз», дейді Т. Жағыпарова.

Дөңгелек үстелдің соңынан «Әділет» тұтынушылар құқығын қорғау қоғамының төрағасы Қабыкен Закарьянов әділ кәсіпкерлер мен бизнес өкілдеріне марапаттау қағаздары мен сыйлықтар табыс етті.