Өткізу пунктіндегі ақау Өзбекстан-Қазақстан шекарасындағы кезекті арттырды
АСТАНА. KAZINFORM — Қазақстан ҰҚК Шекара қызметі «Қапланбек» өткізу пунктінде Өзбекстан бағытына өтуді күтіп тұрған адамдардың жиналғанын хабарлады.
Ведомство мәліметінше, бұл көршілес аумақтағы «Новои» өткізу пунктінің тіркеу жүйесіндегі іркілістерге байланысты.
— Қазақстан тарапынан өткізу пункті штаттық режимде жұмыс істеп тұр, ешқандай шектеулер енгізілген жоқ. Шекара өкілдері шеңберінде өзара іс-қимыл ұйымдастырылды. Өзбек тарапының мәліметінше, ақауларды жою және өткізу пунктінің жұмыс қабілетін қалпына келтіру бойынша шаралар жүргізіліп жатыр. Сапарларды жоспарлау кезінде осы ақпаратты ескерулеріңізді сұраймыз, — делінген ҰҚК хабарламасында.
Бұған дейін үш айда 680 мыңнан астам қазақстандық Өзбекстанға саяхаттап барғаны белгілі болды.
