Отставкаға кеткен Бангладеш премьері Ұлыбританиядан баспана сұрады

АСТАНА. KAZINFORM – Елдегі жаппай ереуіл кезінде отставкаға шығып, елден қашып кеткен Бангладештің Премьер-министрі Шейх Хасина Ұлыбританиядан саяси баспана сұрады, деп хабарлайды ресейлік ТАСС агенттігі.

The Hindu басылымының хабарлауынша, оны алып жүрген әпкесі Рехана Ұлыбритания азаматы. Бұдан бөлек Шейх Хасинаның туысы Тюлип Сидик 2015 жылдан бері Лейбористік партия атынан Ұлыбритания Парламентінің депутаты. Жаңа Премьер-министр Кира Стармердің кабинетінде ол қаржы министрінің орынбасары лауазымына тағайындалған.

Шейх Хасина мінген ұшақ Нью-Делиден 40 шақырым жердегі әскери базаға қонды.

Дереккөздердің хабарлауынша, Үндістан билігі оған қол ұшын созуға келіскен, соған қарамастан ол Лондонға кетуді жоспарлап отыр.

Осыған дейін Бангладеште жексенбі күні полиция мен премьер-министр шейх Хасинаның отставкаға кетуін талап еткен шерушілер арасында қақтығыс болып, кем дегенде 90 адам қаза тапқанын жаздық.

Қаза тапқандар арасында 13 полиция қызметкері бар. Олар ел астанасы Даккадан солтүстікке қарай 100 шақырым жерде орналасқан Сираджгандж қаласындағы полиция бөлімшесіне жасалған шабуылдан қаза тапты.

Сондай-ақ Бангладеш армиясының қолбасшысы ел премьер-министрі шейх Хасина бірнеше аптаға созылған қанды демонстрациялардан кейін отставкаға кеткенін хабарлады.