Өзбекстан Бұхарға баратын туристер санын 8 миллионға арттыруға ниетті
ТАШКЕНТ. KAZINFORM – Өзбекстан үкіметі Бұхара қаласының туристік әлеуетін арттыру мақсатында онда жаңа әуежай салады, деп хабарлайды Kazinform агенттігінің Ташкенттегі меншікті тілшісі Әлихан Асқар.
Өзбекстан президентінің баспасөз қызметінен мәлім еткендей, қазір жұмыс істеп тұрған Бұхара әуежайының турист қабылдау қауқары төмен. Ол сағатына 400 жолаушыға (жылына 1 млн турист) қызмет көрсете алады.
«Ұшу процесін басқару мен жолаушыларға қызмет көрсету, сондай-ақ рейстердің санын ұлғайтуға ескірген жүйелер қолбайлау болып отыр. Туристердің көпшілігі Бұхараға жету үшін әуелі Ташкент, Самарқан немесе Үргенішке ұшуға мәжбүр. Мысалы, биыл 9 айда Бұхарада болған 1 млн-нан астам шетелдік туристің 95%-ы пойызбен немесе көлікпен барған», - делінген Өзбекстан басшысының баспасөз қызметі таратқан хабарламада.
Аймақта қонақ үй қызметі мен қасиетті мекендерге саяхат жасау ісі дамып келеді. Алдағы 3 жылда Бұхараға келетін саяхатшылардың санын 8 млн-ға дейін арттыру жоспарланып отыр.
Осыған байланысты биыл 31 мамырда Шавкат Мирзиёевтің Бұхара облысына жасаған сапары барысында жаңа халықаралық әуежайдың құрылысы басталды. Жоба шеңберінде мемлекеттік-жекеменшік әріптестік негізінде әлемдік стандартқа сай келетін нысан бой көтермек.
Әуежай сағатына 1200 жолаушыға (жылына 3 млн) қызмет көрсетіп, 8 ұшақты қабылдауы тиіс. Сондай-ақ, оған жаңа әуекомпанияларды тарту қарастырылып жатыр.
