Өзбекстан мен Қытай арасындағы әуе тасымалы аптасына 100 рейске дейін ұлғаяды
ТАШКЕНТ. KAZINFORM – Өзбекстан мен Қытай арасындағы әуе тасымалының санын аптасына 100 рейске дейін арттыру жоспарланып отыр, деп хабарлайды Kazinform агенттігінің меншікті тілшісі Әлихан Асқар.
Өзбекстан Көлік министрлігінің мәліметінше, тиісті келісімге Қытайдың авиациялық әкімшілігімен бірлесе қол қойылған.
«Келісім тараптар арасында әуе тасымалын аптасына 100-ге дейін ұлғайтуды, екі елдің кез келген қалаларына ұшу мүмкіндігін ұсыну үшін Өзбекстан мен Қытай әуекомпанияларының ұшу географиясын кеңейтуді (қазіргі уақытта ұшу үшін 7 қала белгіленген) көздейді», - деп мәлім етті Көлік министрлігінен.
Ведомство ақпаратына сай, аталған келісім биыл сәуір айында өтетін қосымша кездесудің қорытындысы бойынша күшіне енеді.
