Өзбекстан Угандамен дипломатиялық қарым-қатынас орнатты
ТАШКЕНТ. KAZINFORM – Өзбекстан мен Уганда арасында дипломатиялық қарым-қатынас орнады, деп хабарлайды Kazinform агенттігінің меншікті тілшісі.
18 қаңтарда Уганданың астанасы Кампала қаласында Өзбекстан Сыртқы істер министрінің бірінші орынбасары Бахромжон Аълоев пен Уганда Сыртқы істер министрі Джедже Одонго дипломатиялық қарым-қатынас орнату туралы бірлескен коммюникеге қол қойды.
Өзбекстанның Сыртқы істер министрлігінен мәлімдегендей, кездесу барысында тараптар саяси, сауда-экономикалық, мәдени-гуманитарлық және басқа да салаларда өзара тығыз ынтымақтастық орнатуға дайын екендіктерін білдірді.
Осылайша, Уганда Өзбекстанмен дипломатиялық қарым-қатынас орнатқан 145-ші ел болды.
Еске сала кетейік, бұған дейін Өзбекстан Тринидад және Тобагомен осындай келісімге келіп, бірлескен коммюникеге қол қойған еді.
