Өзбекстанда 109 бала тамақтан уланып қалды

АСТАНА. KAZINFORM — Ташкент облысының төменгі Шыршық, Аққорған, Піскент және Бөке аудандарындағы балабақша бүлдіршіндері тамақтан уланды, деп хабарлады ӨР Мектепке дейінгі және мектеп білім беру министрлігі. 

Қазір төменгі Шыршық ауданында — 12, Аққорған ауданында 97 бала дәрігерлердің бақылауында, денсаулығы тұрақты.

25 қыркүйекте Мектепке дейінгі және мектеп білім беру министрі Эъзоза Каримова мен министрдің орынбасары Азизбек Тұрдиев аталған істерді жеке тексеру үшін төменгі Шыршық, Аққорған, Піскент және Бөке аудандарындағы мектепке дейінгі білім беру ұйымдарында болғаны атап өтілді. Облыстық құқық қорғау органдары және жергілікті әкімдік қызметкерлерімен бірлесе отырып, балабақшалардың қазіргі жағдайы мен асханалардағы жағдай қаралды. Балабақша жетекшілері және тәрбиешілерімен диалог өткізілді.

— Сақтық шарасы ретінде тиісті ұйымдармен бірлесе отырып, Піскент және Бөке аудандарындағы балабақша тәрбиеленушілері кезек-кезек дәрігерлердің тексерісінен өткізіліп жатыр. Әзірге бүлдіршіндердің денсаулығына айтарлықтай қауіп төнген жоқ, — делінген хабарламада.

Хабарда айтылғандай, жағдай құқық қорғау органдарының бақылауына алынып, тергеу басталды.

Еске сала кетейік, Өзбекстанда адам ағзасын сатумен айналысқан қылмыстық топ мүшелері ұсталды.