Өзбекстанда ауа сапасы нашарлағанда кәсіпорындардың жұмыс уақыты шектелмек
ТАШКЕНТ. KAZINFORM – Өзбекстан Олий Мәжілісінің Сенаты қоршаған ортаға зиянды әсер ететін кәсіпорындардың жұмысын шектеу және оларды тоқтата тұру шартын нақтылайтын түзетулерді мақұлдады, деп хабарлайды Kazinform агенттігінің меншікті тілшісі.
Сенаторлардың пікірінше, құрылыс, өндіріс және урбанизация ауқымының кеңеюі қоршаған ортаға бөлінетін зиянды шығарындылар көлемінің артуына себеп болып отыр.
Жаңа өзгеріске сай, төтенше жағдай, эпидемия және халықтың өмірі мен денсаулығына өзге де қауіп төндірмес үшін қоршаған ортаға зиянды шығарындылар бөлетін объектілердің қызметін 10 күнінен аспайтын мерзімге шектеу және тоқтату мүмкін болады.
Өзбекстан Сенатының төрағасы Танзила Нарбаева табиғатты қорғау және өзге де заңнамаларда мағынасын бұрмалап, басқа мақсаттарға қолданатындай нормалар болмауы тиіс екенін айтты.
«Іс жүзінде бұл түрлі мәселе, түсініспеушілік, наразылық және ең қорқыныштысы сыбайлас жемқорлық жағдайларын тудыруы мүмкін. Осы тұрғыдан алғанда, қабылданып отырған түзетулер өте маңызды. Себебі біздің елімізде индустрияландыру деңгейі жыл сайын артып келеді. Бұл ретте экологияға әсер ету ауқымы да кеңейеді. Әсіресе, мұндай нақты құқықтық нормалар Ташкент сияқты ірі қаламыздағы ауаның шамадан тыс ластануына жол бермеу үшін үлкен маңызға ие», - деді Танзила Нарбаева.
Қоса кетсек, бұған дейін экологиялық ахуалды жақсарту үшін Өзбекстан астанасында автокөліктерге қатысты бірқатар шектеу енгізу ұсынылғанын жазып едік. Атап айтқанда, АИ-80 жанармайын пайдалануға тыйым салу, 2010 жылға дейін шығарылған барлық автокөлік құралдарының қозғалысына шектеу қою және көмір мен мазутты пайдаланудан бас тарту ұсынылды.
