Өзбекстанда экстремистік топтарға қосылған 40-тан аса азамат ұсталды
ТАШКЕНТ. KAZINFORM – Ташкент қалалық ішкі істер бас бақармасымен (ІІББ) өзге де уәкілетті органдар бірлесіп, шаһар аумағында діни экстремизм мен терроризмнің алдын алуға бағытталған рейд жүргізіп жатыр, деп хабарлайды Kazinform агенттігінің Ташкенттегі меншікті тілшісі Әлихан Асқар.
Құзырлы органның мәліметінше, 7 сәуірде Өзбекстан астанасында экстремистік радикалды топтарға қосылған 45 азаматтың үйіне тінту жүргізіліп, күдіктілер қамауға алынды.
«Құрметті азаматтар, әлеуметтік желі арқылы өз идеяларыңызды насихаттаудан және түрлі радикалды топтарға қосылудан аулақ болыңыздар! Әрқашан балаңыздың қандай чаттарға қосылатынын, қандай видео мен материалдарды көретінін бақылауда ұстаңыз», - деп ескертті Ташкент қалалық ішкі істер бас басқармасынан.
Құқық қорғау органының ақпаратына сай, биыл 3 айда діни экстремизм мен терроризм фактілері бойынша 50 қылмыстық іс қозғалды.
Сондай-ақ, осы аралықта 188 әкімшілік хаттама толтырылып, 264 адамға қатысты заңды шара қолданылған.
