Өзбекстанда енді жаппай тәртіпсіздіктерді қаржыландырғандар жазаланады

ТАШКЕНТ. KAZINFORM — Өзбекстанда енді жаппай тәртіпсіздіктерге қатысқандармен қатар, оны ұйымдастыруға тырысқандар мен қаржылай қолдау көрсеткендер жаза арқалайды, деп хабарлайды Kazinform агенттігінің меншікті тілшісі.

Қылмыстық кодекске енгізілген тиісті өзгерістерге Өзбекстан президенті Шавкат Мирзиёев қол қойды.

Құжатқа сай, енді жаппай тәртіпсіздік ұйымдастыру мақсатында арнайы оқудан өткен, практикалық дағдысын ұштаған, қару, жарылғыш және өзге де қауіпті заттарды қолдану әдістерін меңгергендер жазаланады. Атап айтқанда, олар 300-600 базалық есептік шама (жобамен 4,5-9 млн теңге аралығы) мөлшерінде айыппұл төлейді, 3 жылға дейінгі мерзімге қоғамдық жұмысқа тартылады немесе 5-7 жылға бас бостандығынан айырылуы ықтимал.

Бұл ретте, егер жоспарланып отырған жаппай тәртіпсіздік туралы ақпаратты өз еркімен хабарлаған топ мүшелері қылмыстық жауапкершіліктен босатылады.

Сонымен қатар, мұндай жаппай толқулардың салдарынан жеке немесе мемлекеттің мүлкіне залал келсе, азаматтардың денсаулығына зиян тисе және құқық қорғау органдары қызметкерлеріне қарсылық көрсетілсе, онда кінәлілер 10 жылдан 15 жылға дейін бас бостандығынан айырылады.

Еске салайық, былтыр Өзбекстанда жасалған аса ауыр қылмыстар саны 24 пайызға өсті.

Таяуда Өзбекстанда заңсыз байлыққа кенелгендерге жаза енгізу ұсынылды.

Бұған дейін хабарлағанымыздай, былтыр Өзбекстанда жол апатынан 2 мыңнан астам адам қаза тапты. Сондай-ақ, көршілес елде жол ережесін жиі бұзатындар енді көлік басқару құқығынан айырылады.

Мұнымен бірге, 2024 жылы мас күйінде көлік басқарған 31,3 мың өзбекстандық әкімшілік жауапқа тартылды.