Өзбекстанда құрылыс алаңын шаңдатқандар енді айыппұл арқалайды

ТАШКЕНТ. KAZINFORM – Өзбекстан Сенаты алаңды шаңдатып, құрылыс жүргізетіндерге айыппұл салатын заң жобасын мақұлдады, деп хабарлайды Kazinform агенттігінің меншікті тілшісі. 

Сенаторлар құрылыс алаңдарында борайтын шаң мен құм ауа сапасына теріс әсер етіп жатқанын атап өтті. Статистикаға сәйкес, 500 шаршы метр аумақтан 50 тоннаға дейін шаң көтеріледі.

Бұл ретте Өзбекстан заңнамасында дәл осындай әрекеттер үшін кінәлілерді жауапқа тартатын норма жоқ. Сондықтан депутаттар аталған мәселені құқық шеңберінде реттеуге басымдық беріп отыр.

Тиісінше, сенаторлар 500 шаршы метрді қамтып жатқан құрылыс алаңын шаңдатқан лаузымды тұлғаларға 10 базалық есептік шама (145 мың теңге) мөлшерінде айыппұл салатын заңды мақұлдады. Егер бір жыл ішінде осындай құқық бұзушылық қайталанса, онда айыппұл сомасы 50 базалық есептік шамаға (729 мың теңге) дейін ұлғаяды.

Еске салайық, Өзбекстанның ірі қалаларында қоршаған ортаға залал келтіретін кәсіпорындарды ашуға тыйым салынады. Сонымен қатар, Ташкент пен Нүкіс шаһарларында орналасқан ірі өндірістер алыс аумақтарға көшіріледі.

Бұған дейін Өзбекстанда ауа сапасы нашарлағанда ірі кәсіпорындардың жұмыс уақыты шектелуі мүмкін екенін хабарлаған болатынбыз.