Өзбекстандық мұғалімдер оқушыларды энергия үнемдеуге үйретпек

ТАШКЕНТ. KAZINFORM — Өзбекстан мектептеріне оқушыларды энергетикалық сауаттылық негіздеріне үйрететін бағдарлама енгізіледі, деп хабарлайды Kazinform агенттігінің меншікті тілшісі.

Жаңа жоба туралы «Oʻzbekiston 24» телеарнасына сұхбат берген Мектепке дейінгі және орта білім министрі Хилола Умарова айтты.

— Бұл — әр мектеп директоры, мұғалім мен оқушы үшін өте маңызды. Мектепке дейінгі және орта білім министрлігі Техникалық реттеу агенттігімен бірлесіп, оқушыларға энергия ресурстарының маңызын түсіндіруге арналған бағдарлама әзірледі. Өзбекстандықтарға бала кезінен бұл бағытта үнемдеуді үйрету қажет, — деп атап өтті Хилола Умарова.

Министрдің айтуынша, аталған жұмысты жүргізуге жауапты тұлғалар бекітілді. Тиісінше, «Тәрбие», «География» және «Физика» пәндерінде табиғи ресурстарды үнемдеу мысалдары көрсетіліп, оқушыларға оның маңыздылығы түсіндіріледі.

Еске салайық, бұған дейін Өзбекстанның жалпы ішкі өнімін 1 долларға арттыру үшін 2,5 есе көп энергия жұмсалатынын жазып едік.