Өзбекстанның Орталық банкі базалық мөлшерлемені 13,5% деңгейінде сақтап қалды

ТАШКЕНТ. KAZINFORM – Бүгін Өзбекстан Орталық банкінің басшылығы базалық мөлшерлемені жылдық 13,5% деңгейінде сақтап қалу шешімін қабылдады, деп хабарлайды Kazinform агенттігінің Ташкенттегі меншікті тілшісі Әлихан Асқар.

Орталық банктің мәліметінше, жоғары тұтынушылық сұраныс, инвестициялық белсенділік және кейбір тауар мен қызмет бағасының өзгеруіне байланысты инфляцияға айтарлықтай күш түсіп отыр.

«Инфляцияны тұрақты негізде төмендету және орта мерзімді перспективада 5 пайыздық көрсеткішке қол жеткізу мақсатында қатаң ақша-несие саясатын ұстану маңызды. Макроэкономикалық даму және инфляция факторларын ескере отырып жүргізілген болжамға сай, Орталық банк базалық мөлшерлемені жылдық 13,5% деңгейінде сақтап қалу туралы шешім қабылдады», - делінген Орталық банктің хабарламасында.

Сондай-ақ инфляцияның қазіргі және алдағы деңгейіне қатысты тұрғындар мен кәсіпкерлердің болжамында айтарлықтай айырмашылық сезіледі. Атап айтқанда, қыркүйекте жүргізілген сауалнама нәтижесіне сай, халықтың басым көпшілігі инфляция 13,3% деңгейінде болады десе, кәсіпкерлер ол көрсеткіш 12,6%-дан аспайтынын алға тартқан.

«Қолданылып отырған қатаң ақша-несие саясатының нәтижесінде биыл төртінші тоқсанда инфляция біршама төмендеуі ықтимал. Яғни, жыл қорытындысы бойынша жалпы инфляция көрсеткіші шамамен 9,5% деңгейінде болуы мүмкін. Қаңтар-қыркүйек аралығында экономиканың барлық негізгі салаларында байқалған оң динамиканың арқасында жалпы ішкі өнімнің нақты өсімі 6,6%-ға теңелді. Осының негізінде биыл Орталық банк ЖІӨ-нің нақты өсу қарқынын 6%-6,5% деңгейінде болжап отыр», - деп атап өтті Өзбекстанның Орталық банкінен.

Бұған дейін хабарлағынымыздай, жыл соңына қарай Өзбекстанның жалпы ішкі өнімі 6-6,5% өсуі ықтимал.

Еске салайық, бұған дейін Еуропалық қайта құру және даму банкі Өзбекстанның ЖІӨ биыл 6,5%-ға, ал 2025 жылы 6%-ға өсетінін болжаған еді.

Сонымен қатар, Өзбекстан 2030 жылға қарай жалпы ішкі өнім көлемін $200 млрд жеткізуді жоспарлап отыр.