Өзбекстанның үш мәдени мұрасы ЮНЕСКО тізіміне енгізілді
ЮНЕСКО Үкіметаралық комитетінің 18-ші сессиясында Өзбекстаннан үш номинация адамзаттың материалдық емес мәдени мұрасының репрезентативті тізіміне енгізілді, деп хабарлайды Kazinform.
Өзбекстанның мәдениет және өнерді дамыту қоры ұсынған ақпаратқа сай, «Өзбекстанның керамика өнері» номинациясы комиссия мүшелерінің жоғары бағасына ие болған. Бұл - қолөнердің терең тарихын, керамика саласындағы ілімнің ұрпақтан ұрпаққа жалғасуын және жастардың оны сақтауға белсенді қатысқанын айғақтайды.
«Керамика - Өзбекстандағы ең көне және ерекше халық өнерінің бірі саналады. Керамиканың Риштан, Бұхара, Гурумсарай, Ташкент, Хорезм, Самарқанд және Қашқадария сияқты қыш мектептері негізгі орталықтар болып қалыптасқан. Олар бір-бірінен бұйымдарды жасау тәсілімен, өрнектерімен, түстерімен және пішіндерімен ерекшеленеді», - деп мәлім етті аталған қор.
Әзербайжан, Тәжікстан, Түркия және Иранмен бірлесіп енгізілген тағы екі номинация - «Иллюминация өнері: Наккошлик» және «Ифтар және оның әлеуметтік-мәдени дәстүрлері».
«Жаңа номинациялардың арқасында ЮНЕСКО-ның қорғауындағы материалдық емес мұралар қатарына Өзбекстан ұсынған элементтер саны 15-ке жетті. Бұл олардың өркениет үшін маңыздылығын көрсетіп тұр. Ол өз кезегінде халықаралық деңгейде бай мәдени мұраны ілгерілету мен қорғаудағы маңызды қадам», - делінген қордан ұсынылған хабарламада.
Еске сала кетейік, ЮНЕСКО Бас конференциясының 2025 жылғы сессиясы Самарқандта өтеді.
