Өзбекстанның жалпы ішкі өнімін 1 долларға арттыру үшін 2,5 есе көп энергия жұмсалады

ТАШКЕНТ. KAZINFORM – Өзбекстанда ірі кәсіпорындар үшін электр энергиясы, газ және мұнай өнімдерін тұтыну нормативі бекітіледі, деп хабарлайды Kazinform агенттігінің меншікті тілшісі.

Электр энергиясын үнемдеу мәселелері бойынша кеңес өткізген Өзбекстан президенті Шавкат Мирзиёев былтыр елде 50 млрд текше метр табиғи газ және 81 млрд киловатт-сағат электр энергиясы өндірілгенін атап өтті.

Болжамға сәйкес, 2035 жылға қарай көршілес мемлекетте электр энергиясын тұтыну көлемі 1,7 есе артады. Бұл қажеттілікті жабу үшін тек өндіру көрсеткіштерін арттыру жеткіліксіз. Тиісінше, энергияны үнемдеуге мүмкіндік беретін механизмдерді енгізуге басымдық беру қажет.

Өзбекстан басшсының баспасөз қызметінен мәлім еткендей, елдің жалпы ішкі өнімін 1 долларға арттыру үшін өзге әлем мемлекеттерімен салыстырғанда 2,5 есе көп энергия жұмсалады. Сонымен қатар, электр энергиясының – 14%, табиғи газдың 7%-дан астамы желілерде шығындалып жатыр.

Аталған мәселелерді шешу үшін Шавкат Мирзиёев жауапты органдарға бірқатар тапсырма берді. Яғни, биыл республика бойынша 1,6 млрд текше метр табиғи газ және 3,5 млрд киловатт-сағат электр энергиясын үнемдеу жоспарланып отыр.

Бұл нәтижеге қол жеткізу үшін әрбір кәсіпорын мен ұйымға ғылыми талдауға негізделген ұсыныс беріліп, нормативтер белгіленеді. Осы жұмыстардың есебінен электр энергиясның шығынын 5-10%-ға қысқарту көзделген.

Еске салайық, Өзбекстанның ірі қалаларында қоршаған ортаға залал келтіретін кәсіпорындарды ашуға тыйым салынады.

Сондай-ақ, биыл 2,5 айда өзбекстандықтар 25 млн доллардың газын заңсыз пайдаланған.

Мұнымен бірге, Өзбекстанда электр жүйесіне заңсыз қосылған майнинг ферма $138 мың шығын келтірді.