Париж-2024: Олимпиада алдындағы әлемдік рейтингте қазақстандық спортшылар қай орында тұр
АСТАНА. KAZINFORM – Санаулы күндерден кейін, нақтырақ айтсақ, 26 шілде күні Франция астанасы Парижде XXXIII жазғы Олимпиада ойындардың алауы тұтанады. Төртжылдық додаға төрткіл дүние көз тігетіні анық.
Қазір Олимпиада ойындарына Қазақстан құрамасы лицензиялар санын 80-ге жеткізді. Бұл Париж Олимпиадасы Қазақстанның тәуелсіз ел ретінде қатысқалы отырған сегізінші жазғы Олимпиадасы болмақ. Сондай-ақ Еуропа құрлығында үшінші рет (Афина, Лондон, Париж) бақ сынайды. Осы орайда ҚР Ұлттық олимпиадалық комитеті атап өткендей, қазіргі таңда Қазақстан командасы аталған басты додаға соңғы жаттығу жиындарын өткізіп жатыр. Олимпиада қарсаңында отандастарымыздың әлемдік рейтингтегі орны да белгілі болды.
Әлемдік рейтинг көп жағдайда жеребе тарту рәсіміне әсер етеді және спортшының жарыс алдындағы деңгейінен хабар береді. Әзірге, Қазақстан командасы сапынан әлемдік рейтингте бірінші орында тұрған спортшы – Азамат Дәулетбеков. Еркін күрестен 86 келі салмақта сынға түсетін балуан біраздан бері тізгінді ешкімге берген жоқ. Азамат – соңғы әлем чемпионатының қола жүлдегері.
Олимпиадаға қатысатын тағы бір балуанымыз Әлішер Ерғали әлемдік рейтингте 8-орында тұр. Ал Парижге жолдама алғаны күні кеше белгілі болған Мейрамбек Қартбай өз салмағында төртінші орында.
Грек-рим күресінен 60 келідегі Айдос Сұлтанғали алғашқы ондыққа енген жоқ. 77 келідегі Демеу Жадыраев UWW түзген рейтингте 7-сатыға тұрақтады. 87 келідегі Нұрсұлтан Тұрсынов бесінші сатыда.
Теннистен Қазақстан командасының үздігі Елена Рыбакина WTA рейтингінде 4-орында келеді. Парижде бақ сынайтын тағы бір отандасымыз Юлия Путинцева әлемнің 38-ракеткасы саналады.
Ерлер арасында сынға түсетін Александр Бублик АТР рейтингінде 23-сатыға орналасты. Александр Шевченко әлемдік рейтингтің 57-орнында.
Дзюдошылар арасындағы ең жоғарғы рейтинг Әбиба Әбужақыноваға (48 келі) тиесілі. Ол олимпиадалық рейтингте үздік үштікті тұйықтап тұр. Ерлер арасында ең көп ұпай жинаған Абылайхан Жұбаназар (81 келі) оныншы сатыға тұрақтады. Елдос Сметов (60 келі) рейтингте 22-орында.
Семсерлесуден әлемдік рейтинг нәтижесі Олимпиада ойындарының жеребе тарту рәсіміне тікелей әсер етеді. Командалық сында Қазақстан құрамасы әлемдік рейтингте 4-орында.
Ал жекелей сында қазақстандық спортшылар арасынан Руслан Курбанов жоғары орналасқан. Ол 12-сатыда. Ерлік Сертай 35, Эльмир Алимжанов 47, Вадим Шарлаимов 65-орында. Сондай-ақ, велоспорттан Қазақстан командасы өткен маусым қорытындысы бойынша UCI рейтингінде 19-орын алды.
Спорттық гимнастика өкілі Нариман Курбанов әлем кубогі кезеңдерінен соң құрылған рейтингте 2-орын иеленіп, Париж Олимпиадасына жолдама алған болатын.
Естеріңізге сала кетейік, Франция астанасы Париж қаласында өтетін XXXIII жазғы Олимпиада ойындары 26 шілде мен 11 тамыз аралығында өтеді. Ойындарға әлемнің 205 елінен 10 500 спортшы қатысады деп жоспарланған. Онда 32 спорт түрінен 329 медаль жиынтығы сарапқа салынады.
