Парламент Жол белгілері туралы конвенцияны толықтыратын Еуропалық келісімді қабылдады
Аталған келісімнің мақсаты - оған қатысушылардың жол белгілеріне, сигналдары мен белгілеулеріне және жол таңбаларына қатысты жол жүрісі қағидаларын біріздендіру, сондай-ақ халықаралық жол жүрісін жеңілдету және жолдардағы қауіпсіздікті арттыру болып табылады. Келісімге сәйкес, тараптар өз аумақтарында қолданылатын жол белгілері мен сигналдарының және жол таңбаларының жүйесі келісімнің қосымша ережелеріне сәйкес келуі үшін тиісті шараларды қабылдайды. Ал келісімде белгіленген жүйеге сәйкес келмейтін барлық сигналдық белгілер, таңбалар мен құрылғылар заң жобасы күшіне енген күннен бастап он жыл ішінде ауыстырылуы тиіс. «Келісімді ратификациялау Қазақстан Республикасындағы жол-көлік жарақатын төмендету мәселелеріндегі ынтымақтастықты одан сайын дамытуға елеулі үлесін қосады. Жол жүрісін ұйымдастыруды жетілдіру жөніндегі іс-шараларды жүзеге асыруға, жол-көлік оқиғаларының алдын алуға, жолдағы қауіпсіздік талаптарын халықаралық стандарттарға сәйкес келтіруге ықпал ететін болады», - деді құжат бойынша баяндаған ІІМ-нің орынбасары Амантай Күреңбеков.
Парламент қабылдаған заң теріс әлеуметтік әрі экономикалық салдарға әкеп соқпайды. Құжат Елбасының қол қоюына жолданатын болады.