«Партиялық тізімнің күші неге жойылды?» - республикалық басылымдарға шолу

АСТАНА. 29 желтоқсан. ҚазАқпарат - Қазақ ақпарат агенттігі республикалық басылымдарда 29 желтоқсан, бейсенбі күні шыққан өзекті материалдарға шолуды ұсынады.

***

«Егемен Қазақстан» газетінің жазуынша, кеше ҚР Орталық сайлау комиссиясының төрағасы Қуандық Тұрғанқұловтың төрағалық етуімен Комиссияның кезекті отырысы өтті. Онда бір мәселе - «Руханият» партиясының партиялық тізімін тіркеудің күшін жою туралы мәселе қаралды. Отырысқа Комиссия мүшелерімен қатар, халықаралық ұйымдар мен отандық қоғамдық бірлестіктердің бай­қаушылары, Бас прокуратураның өкілдері және «Руханият» пар­тия­сы­ның жетекшілері қатысты. Аталған мәселе жөнінде Орталық сайлау комиссиясының хатшысы Бақыт Мелдешов баяндама жасады. Оның хабардар етуінше, осы жылдың 27 жел­тоқ­санында Орталық сайлау комис­сия­сы­на Қазақстан Республикасы Бас про­ку­ратурасының Алтыншаш Жағанова­ның «Руханият» партиясының пар­тия­лық тізімін ұсыну және тіркеу тәр­ті­бінің бұзылуы туралы өтінішін қарау нәтижелеріне байланысты тұжырымы келіп түскен. Мақаланың мән-жайын білгіңіз келсе «Партиялық тізімнің күші неге жойылды?» деген тақырыпқа назар аударыңыз.

«Астанадағы «Думан» ойын-сауық орталығында Қазақ­стан Республикасы Прези­денті­нің атынан жетім балалар мен ата-ана қамқорлығынан айырыл­ған балаларға арналған Жаңа жыл­дық шырша өтті», - деп жазады «Егемен Қазақстан» газеті. Басылымның атап өтуінше, осында балаларды Елбасы Нұр­сұлтан Назарбаев LED-дис­плейдегі экран арқылы келе жатқан Жаңа жылмен құттықтап, мол бақыт, зор денсаулық, оқуда озат болуға тілектестігін білдірді. «Қымбатты балалар, бүгін бай­тақ еліміздің барлық өңірінде өне­гелі балалар Жаңа жылдық шыр­шаның айналасына жинал­ды. Жаңа жыл, ең алдымен, балалар мен бүлдіршіндерге қуаныш сыйлайтын мереке. Мен сендерді, сендер арқылы барша қазақ­стан­дық балаларды келе жатқан Жаңа жыл мерекесімен құттықтаймын», - деді Президент Н.Назарбаев.

***

«Ел Үкімет Кәрім Мәсімовтің төрағалығымен кеше осы жылдағы өзінің соңғы отырысын өткізді», - деп жазады «Айқын» газеті бүгінгі санындағы «Келер жылдан күтеріміз көп» деген тақырыптағы мақаласында. Басылымның атап өтуінше, ең алдымен Министрлер кабинеті Маңғыстау облысынан бейнебайланысқа шыққан «Самұрық-қазына» ӘАҚ басшысы Өмірзақ Шөкеев пен облыс басшысы Бауыржан Мұхамеджановтың Жаңаөзенді қалпына келтіру жұмыстары жайындағы мәліметтерін тыңдады. Осыдан кейін күн тәртібі бойынша Қазақстанның «Қоян жылындағы» экономикалық, «әлеуметтік, демографиялық дамуының алдын ала қорытындылары шығарылды.

***

«Кеше Астанада республиканың Ұлттық қауіпсіздік комитеті Террорға қарсы орталығы Ведомствоаралық үйлестіру комиссиясының (ВҮК) қорытынды мәжілісі болып өтті», деп жазады «Казахстанская правда» газеті. Комиссия жұмысының өзекті мәселелері, соның ішінде мемлекеттік органдардың террорға қарсы іс-қимыл саласындағы өзара әрекеттестіктері қаралды. Комиссия жұмысына 11 республикалық министрлік пен ведомство басшылары мен өкілдері қатысты.