Павлодар облысында әмбебап құтқару бөлімшесі ашылды
ПАВЛОДАР. KAZINFORM — Жаңа бөлімше өрт сөндіру бөлімін, трассалық-құтқару пунктін және Апаттар медицинасы орталығының бригадасын біріктіреді.
Төтенше жағдай қызметі мамандарының пікірінше, мұндай формат өрттерге, жол-көлік оқиғаларына және өзге де төтенше жағдайларға тез арада ден қоюға мүмкіндік береді.
Аққулы ауданындағы «Омбы-Майқапшағай» республикалық маңызы бар автожолының бойында әмбебап құтқару бөлімшесі ашылды. Павлодар қаласынан 100 км жерде орналасқан жаңа кешен еліміздегі мұндай үшінші нысан. Оның бірегейлігі — бірнеше шұғыл қызметтердің бірге қызмет атқаруына жағдай тудыруында. Яғни бір аумақта өрт сөндіру бөлімі, Апаттар медицинасы орталығының трассалық медициналық-құтқару пункті тоғысқан. Жақын арада мұнда облыстық төтенше жағдайлар департаменті жедел-құтқару жасағының қызметкерлері жұмыс істей бастайды.
— Министрлік ауылды жерлердегі қауіпсіздікті арттыруға бағытталған «Ауыл құтқарушылары» бағдарламасын жалғастыруда. Мұндай біріккен қызмет уақытты қысқартуға мүмкіндік береді. Төтенше жағдайдың сипатына қарамастан, яғни өрт, жол-көлік оқиғасы немесе шұғыл медициналық көмек болсын, мамандар үйлесімді, жедел және тиімді әрекет етеді. Нысанды жаңарту бюджет қаражатынсыз жүзеге асырылды. Өрт сөндірушілерді, құтқарушылар мен дәрігерлерді бір базада біріктіру — бұл жай ғана ыңғайлылық үшін жасалған дүние емес. Бұл — төтенше жағдайдан зардап шеккендерге алғашқы минуттарда жедел көмек көрсетудің нақты мүмкіндігі. Біз мұндай кешендер автожолдардың стратегиялық маңызды учаскелерінде болуы үшін жұмыс істеп жатырмыз, - деді нысанның ашылу салтанатына қатысқан ҚР Төтенше жағдайлар министрі Шыңғыс Әрінов.
Орталықтың Аққулы ауданында орын тебуі оның стратегиялық маңыздылығын ескере отырып таңдалған. Себебі ол Павлодар облысының аумағын ғана емес, «Семей орманын» да қамти алады. Резерваттар мен көліктің жетуі қиын учаскелерге де көмек көрсетуге мүмкіндік береді. Кешен төтенше жағдай салдарын жою үшін қажетті заманауи техникамен және жабдықтармен жарақталған. Аумағында зардап шеккендерді шұғыл эвакуациялау және құтқару топтарын шалғай аудандарға жедел тасымалдау үшін тікұшақ алаңы қарастырылған.
Екі қабатты ғимаратта мамандар тәулік бойы кезекшілік етеді.
Жеке құрам үшін қолайлы жағдайлар жасалған: демалуға арналған бөлмелер, душ бөлмелері, ас үй, сондай-ақ арнайы техникаға қызмет көрсету үшін техникалық аймақтар қарастырылған. Министр атап өткендей, бұған дейін мұндай кешендер Ақмола және Қарағанды облыстарында пайдалануға берілген.
Іс-шара соңында Төтенше жағдайлар министрлігінің басшысы қызметкерлерге жаңа арнайы техниканың кілттерін, Алғыс хаттар табыс етті. Сондай-ақ өңірлік департаменттегі бірнеше қызметкердің кәсібилігі мен адалдығын атап өтіп, оларға кезектен тыс шендер берді.
Еске сала кетейік, Павлодар — Семей автожолында көлік апатынан жүргізуші қаза тапты.
