Павлодар облысында қар құрсауында қалған жолаушылар құтқарылды

ПАВЛОДАР. KAZINFORM — 112 пультіне Жасыбай демалыс аймағынан 10 шақырым жерде жолаушылары бар жеңіл автокөлік қар құрсауында қалып қойғаны туралы хабарлама түскен.

Баянауыл ауданында қар құрсауында қалып қойған жолаушылар құтқарылды. Олар жеңіл автокөлікпен жолға шығып, боранда тұрып қалған.

— 112 пультіне Жасыбай демалыс аймағынан 10 шақырым жерде жолаушылары бар жеңіл автокөлік қар құрсауында қалып қойғаны туралы хабарлама түскен. Оқиға орнына келген құтқарушылар 4 адамы бар көлікті жолдың тазартылған учаскесіне сүйреп шығарды. Медициналық көмек ешкімге қажет болмады. Жүргізуші құтқарушыларға алғысын білдірді, -деп хабарлады Төтенше жағдайлар министрлігінің баспасөз қызметінен.

Төтенше жағдай қызметінің мамандары жүргізушілерге сапарға шығар алдында ауа райы болжамын бақылап, ықтимал жағдайлар үшін қажетті заттарды өзімен бірге алып жүруге кеңес береді.

Бұған дейін ТЖМ құтқарушылары Шығыс Қазақстанда қар құрсауында қалған 4 адамды құтқарған болатын.