Павлодар облысында шыбын-шіркейді улау жұмыстарына дайындық басталды

ПАВЛОДАР. KAZINFORM - Биыл шыбын-шіркейге қарсы күреске 182 мың кг биологиялық препарат қолдану жоспарланған.

Әуеден өңделетін аумақтың жалпы көлемі 127 мың гектардан 172 мың гектарға дейін ұлғайтылмақшы. Бұл өткен жылмен салыстырғанда 45 мың га артық. Әуеден өңдеу жұмыстарына 10 ұшақ тартылады.

Қазіргі уақытта 20 мың кг көлемінде «Бактицид» биопрепаратының бірінші партиясы жеткізілді. 2 сәуірде облыс орталығына осы препараттың тағы 20 мың кг жеткізу жоспарлануда. Қалған 142 мың кг препарат сәуір айының бірінші онкүндігінде жеткізіледі.

- Улау жұмыстарына қосымша Ақсу қаласының ауылдық аймағының солтүстік-батыс бөлігінен 15 мың гектар және Ертіс ауданының жайылма алқабынан 30 мың гектар қосылған. Өңделетін аумақтың кеңеюі препараттардың да көлемін ұлғайтуды талап етті. Биыл шыбын-шіркейге қарсы күреске 182 мың кг биологиялық препарат қолдану жоспарланған,-деп хабарлады облыс әкімінің баспасөз қызметінен.

Химиялық препараттардың да көлемі өскен - 14,5 мың литр пайдалану жоспарлануда. Оның ішінде 9,2 мың литр - әуеден өңдеуге, 5,3 мың литр - тосқауылды өңдеуге жұмсалады.
Химиялық препараттар сәуірдің екінші онкүндігінде жеткізіледі деп күтіліп отыр.

Мамандар шыбын-шіркейді улау жұмыстарының мерзімін әзірше белгілеген жоқ.

Еске сала кетейік, 2024 жылы Павлодарда шыбын-шіркейге қарсы улау жұмыстары шілденің ортасына дейін жалғасқан еді.