Павлодар облысында зираттар цифрланып жатыр

ПАВЛОДАР. KAZINFORM - Зират басындағы құлпытастар суретке түсіріліп, арнайы платформаға енгізіледі. Жобаға өңір бойынша 20-ға жуық мұсылман зираты қосылады деп жоспарланған.

Мұсылман зираттарындағы құлпытастарды цифрлы жүйеге енгізу бұған дейін Астана және Шымкент қалаларында жүргізілген. Ендігі кезекте бірнеше облыспен бірге Павлодар өңірінде де қолға алынып жатыр. Бірыңғай платформа болашақта туыс-туғандарыңыздың жерленген жерін іздеген уақытта ыңғайлы болады.

«Біздің еріктілер зираттың басындағы құлпытасты фотоға түсіріп, базаға енгізеді. Құлпытасы бар аты-жөндер платформада тұрады. Ал жазуы өшіп қалған құлпытастар мен аты жазылмаған қабірлерді анықтау үшін зират басындағы шырақшылармен жұмыстар жүргізіледі», дейді «Қамқор-Шапағат» орталығының директоры Мейрамбек Қабылбекұлы.

Әзірге Павлодар облысы бойынша 20-ға жуық мұсылман зираты жүйеге қосылады.

Бұдан бөлек, «Қамқор-Шапағат» орталығының бастамасымен «Жерлеу» қосымшасы қолданысқа енгізілмек. Онда жерлеу, ас беру, жерлеу орны, қайтыс болғаны туралы анықтамалар алуға болады. Осылайша зират көтеруде бірізділік мәдениеті қалыптасады.