Павлодар облысының әкімі «Ертіс» ФК-ға «қола» үшін алғыс білдірді

АСТАНА. ҚазАқпарат - Павлодар облысының әкімі Болат Бақауов «Ертіс» футбол клубының бас бапкері Димитар Димитровпен және жартылай қорғаушы Карлос Фонсекамен кездесіп, команда ойыншыларына XXV Қазақстан чемпионатында үшінші орынға қол жеткізгендері үшін алғысын білдірді, деп хабарлайды ҚазАқпарат аймақ басшысының ресми сайтына сілтеме жасап.

Болат Бақауов биылғы маусым павлодарлықтар үшін аса сәтті аяқталғанын атап өтіп, «Ертіс» аяқдопшылары алдағы уақытта да облыс тұрғындарын жарқын жетістіктерімен қуанта беруіне тілектестігін білдірді.

«Ел Тәуелсіздігінің ширек ғасырында біздің команда 15 рет жоғары үштікке еніп, ел чемпионатында 5 мәрте топ жарды. Мен өз басым осы жылдың өзінде Қазақстан Кубогы үшін өтетін жарыста жеңіске жетеміз деп үміттенемін. Ең бастысы, жанкүйерлер сіздердің ойындарыңызға дән риза», - деді облыс әкімі.  

Өз кезегінде Димитар Димитров клуб ойыншылары үшін ең бастысы жанкүйерлердің сенімі екендігін атап өтті. Сонымен қатар, ол өзі баптайтын футбол командасы келесі маусымда жанкүйерлердің сенімін ақтап, жеңіс тұғырынан көрінеді деп сендірді.

Ағымдағы ойын маусымында «Ертіс» футбол клубын кем дегенде бір ойын күтіп тұр. 6 қараша күні павлодарлық клуб Астана қаласында Қазақстан Кубогы үшін жергілікті футбол командасымен айқасқа түседі.