Павлодарда 6 млрд теңгеге мемлекеттік салу алу шарты заңсыз жасалған
Павлодар облысында 6 млрд теңгеге жасалған мемлекеттік сатып алу туралы 11 келісімшарт сот шешімімен жарамсыз деп танылды, деп хабарлайды Кazinform.
«Павлодар облысында жеткізушілерді мемлекеттік сатып алудың бәсекеге қабілетті емес тәсілімен таңдау фактілері анықталды.
Мәселен, «Еңбек-Өскемен» РМК филиалымен және «ҚазҚұрылысСервис» ЖШС-мен бір көзден негізсіз жасалған шарттардың жалпы сомасы 6 млрд теңгені құрады.
Қалалық прокуратураның қадағалау актісінен кейін Ішкі мемлекеттік аудит департаменті талап-арыз жұмыстарын жүргізді.
Павлодар облысының мамандандырылған ауданаралық экономикалық сотының шешімдерімен 11 шарт жарамсыз деп танылды», - делінген мәліметте.
Сонымен қатар Павлодар қаласы әкімдігінің құрылыс бөлімінің басшысы Әкімшілік құқықбұзушылық туралы кодекстің 207-бабы (мемлекеттік сатып алу туралы заңнаманы бұзу) бойынша әкімшілік жауапкершілікке тартылған.
