Павлодарда адам ұрлаумен және бопсалаумен айналысқан қылмыстық топ ұсталды
ПАВЛОДАР. KAZINFORM - Павлодарда облыстық прокуратураның бастамасымен адам ұрлаумен және бопсалаумен айналысқан қылмыстық топты жедел-іздестіру шаралары жүргізілді.
Экономикалық тергеулер департаментінің қызметкерлері Сыбайлас жемқорлыққа қарсы қызметтің қолдауымен құқық қорғау органдарының бұрынғы қызметкерлері мен ұйымдасқан қылмыстық топ мүшелерінен құралған топтың іс әрекетін тоқтатты.
— Бұл топ ірі көлемде ақша қаражатын иемдену мақсатында жәбірленушіні оның автокөлігінде күш қолдану арқылы ұстаған. Адам ұрлау және бопсалау деректері бойынша ҚР Қылмыстық кодексінің 125 және 194-баптары негізінде прокуратураның Сотқа дейінгі тергеп-тексерулердің бірыңғай тізілімінде тіркелді. Алдын ала тергеу арнайы прокурорлармен жүргізіліп жатыр. Күдіктілер ұсталды, оларға қатысты сотпен қамауға алу шарасы таңдалды, - деп хабарлады өңірлік прокуратурадан.
Қазіргі уақытта күдіктілердің өзге қылмыстық әрекеттерін анықтау бойынша тергеу амалдары жүргізіліп жатыр. Тергеу мүддесі үшін басқа ақпарат ҚР Қылмыстық процессуалдық кодексінің 201-бабына сәйкес жарияланбайды.
Еске сала кетейік, прокурорлар Павлодарда мүгедек балаларға арналған оңалту орталығы алаяқтықпен айналысқанын анықтады.
