Павлодарда сотталғандар түрме шатырындағы спутниктік интернетті қолданып келген

ПАВЛОДАР. KAZINFORM — Ол арқылы № 46 түзеу мекемесінде жазасын өтеп отырғандар интернетке және күзетшілердің бейнекамерасына қосылған.

Колония ішінде call-орталық құрылып, сотталушылар заңсыз есірткі бизнесімен айналысқан деген күдік бар.

Облыс орталығында № 46 түзеу мекемесіндегі екі қабатты әкімшілік ғимараттың төбесінен сотталушылар пайдаланып келген интернет қабылдағыш табылды. Ол арқылы жазасын өтеп отырғандар интернетке қол жеткізіп, ұялы байланысты пайдаланған. Сондай-ақ call-орталық құрып, сол жерден заңсыз интернет бизнесін басқарған деген күдік бар. Тіпті, сотталушылар ол жердегі компьютерлік құрылғылардың көмегімен түрме күзетінің бейнкамерасына қосыла алған.

Бұл ақпаратты Павлодар облысы бойынша қылмыстық-атқару жүйесі департаментінің баспасөз қызметі растады.

— Аталған дерек бойынша құзырлы органдармен қылмыстық іс қозғалды. Колонияның және Қылмыстық атқару-жүйесі департаментінің бірқатар қызметкерлері жауапкершілікке тартылып, мекеме бастығы атқарып отырған лауазымынан босатылды. Қазір тергеу-тексеру шаралары жүріп жатыр. Қылмыстық-атқару жүйесі комитеті заң бұзушылыққа принципті ұстанымын білдіреді. Тергеу шараларына жан-жақты көмек көрсетілуде, — деп хабарлады өңірлік департаменттен.

Еске сала кетейік, кеше сотталғандарды азаптады деп айыпталған түрменің 12 қызметкеріне қатысты үкім шықты.