Павлодарда түрмедегі бейнекамераны қасақана сындырған азаматқа сот тағы бір жыл қосып берді

ПАВЛОДАР. KAZINFORM - Сотталушы қауіпсіздігі орташа түзеу мекемесінде жазасын өтеп жатқан. Алдындағы қылмысы үшін ол 9 жылға бас бостандығынан айырылған.

Павлодардағы №45 түзеу мекемесінде жазасын өтеп жатқан сотталушы бейнекамераларды қасақана сындырған.

- Мемлекеттік айыптаушының принципті позициясына байланысты сот ҚР Қылмыстық кодексінің 428-1-бабының 1-бөлігі (қылмыстық-атқару жүйесі мекемелеріндегі, тергеу изоляторларындағы және уақытша ұстау изоляторларындағы бейнебақылау жүйесін немесе оның компоненттерін қасақана жою немесе бұзу) бойынша сотталғанның кінәсін дәлелдеді. Сотталушы ауыр қылмыстар жасағаны үшін жазасын №45 мекемесінде (қауіпсіздігі орташа) өтеп жатқан. Бірақ теріс мінез-құлықпен ерекшеленіп, екі бейнебақылау камерасын қасақана сындырып, белгіленген тәртіпті бұзу мақсатында әрекет етті, – деп хабарлады мекеме бастығының орынбасары, әділет майоры Дархан Нажмиденов.

Сот колония мүлкін сындырған азаматты кінәлі деп танып, оған бір жыл бас бостандығынан айыру жазасын тағайындады. Осыған байланысты оның қамау мерзімі ұзартылып, қауіпсіздік деңгейі жоғары мекемеге ауыстырылды. Бұған дейін ол 9 жылға сотталғаны белгілі болып отыр.

Еске сала кетейік, Екібастұзда бала өліміне қатысты қылмыстық іс қозғалды.