Павлодарда жантүршігерік көлік апатынан 16 жасар қыз бала қайтыс болды

ПАВЛОДАР. KAZINFORM — Павлодардың қақ ортасында болған жол-көлік апатынан кәмелет жасына толмаған қыз бала көз жұмды. Тағы екі жасөспірім түрлі жарақат алған. Оның бірі жансақтау бөлімшесінде жатыр.

Облыс орталығындағы Назарбаев даңғылында жол-көлік апаты болып, салдарынан 16 жасар қыз бала қайтыс болып кетті. 

Бұл туралы бала құқықтары жөніндегі өңірлік уәкіл Сәуле Шәкенова хабарлады. 

— Түнгі уақытта Назарбаев даңғылында жантүршігерлік жол-көлік апаты болып, 16 жасар жолаушы қыз бала оқиға орнында қаза тапты. Тағы екі кәмелет жасына толмаған жасөспірім зардап шеккен. Оның бірі — 15 жасар қыз бала ауыр жағдайда ауруханаға жеткізіліп, ота жасалған. Қазіргі уақытта жансақтау бөлімшесінде жатыр. Ал 14 жасар ер бала өміріне қауіп төндірмейтін жарақаттармен емдеу ұйымына жеткізілді», - деп мәлімдеді С. Шәкенова.

Апат кезінде кәмелет жасына толмағандардың жанында заңды өкілдері болмаған. Оқиғаның мән-жайы анықталып жатыр.

Еске сала кетейік, биыл тамыз айында Ақтөбеде көлік өртеніп, 10 жастағы қыз бала жанып кетті.