Павлодардың бір ауылында бұралқы иттер ұсақ малға шауып жатыр

ПАВЛОДАР. KAZINFORM - Ақтоғай ауылында қаңғыбас иттер қозы-лақтарды алқымдап кеткен. Төрт түлікпен күнелтіп отырған тұрғындар күні-түні мал қораларын күзетіп әлек.

Павлодар облысы Ақтоғай ауданының тұрғындарынан бұралқы иттердің малға шабуылдағаны туралы шағымдар жиілеп кеткен. Аудан орталығында бір топ ит жұрттың қоражайларына кіріп, қозы-лақтарын қырып жатыр. Тұрғындардың айтуынша, қараусыз жүрген жануарлар бұзау-тайыншаға дейін ауыз салатын көрінеді.

- Осыдан он шақты күн бұрын көршімнің қорасына кіріп, 4 қозысын жайратып салған. Кеше біздің үйдің малына шабуылдап, бір қозымызды жеп кетті. Айдың-күннің аманында қаңғыбас иттерден қорлық көріп отырмыз. Ветеринариялық стансаның қызметкерлері көршімнің үйіне келіп, өлген малдан сынама алып кеткен екен. Содан хабар жоқ. Анау иттер біздің үйімізді торуылдап жүр. Балаларымыз мектептен қараңғыда қайтады. Енді солардың өмірі үшін алаңдай бастадық. Жауапты органдар жануарларды аулап, көзін құртпаса, малымыз шығындала беретіні анық. Ал өлген малдың құнын бізге ешкім өтеп бермейтіні анық,-деп қынжылады ауыл тұрғыны Мәруа Конселхан.

Тұрғынның сөзінше, топтанып жүрген 4-5 бұралқы жануар адамнан қорықпайды. Ауылдың шеткері үйлерін жағалап, реті келсе малға шабуға дайын жүреді екен.

Өңірлік ветеринария басқармасы ветеринария және лицензиялау бөлімінің басшысы Ғалым Бейсеновтің айтуынша, аталған аудан басында тұратын азаматтардан әзірше ондай шағым түспеген.

- Әлеуметтік желіде тараған видеодан ұсақ малдардың өліп жатқанын көрдік. Бірақ мал иелері бізбен байланысқа шықпады әрі деректерді нақтылай алмай отырмыз. Егер шағым тіркелсе, малдардан сынама алынып, иттерде қандай да бір аурудың бар-жоқтығы тексеріледі. Алгоритмге сәйкес одан әрі қаңғыбас жануарларды аулау жүргізіледі. Өткен жылы қаңғыбас иттердің малға шабуылдағаны туралы деректер тіркелді. Ал биыл әзірше ондай деректер ресми түрде анықталған жоқ, - дейді ол.

Еске сала кетейік, Өскеменде бір аптада 11 адамды ит қапты.