Павлодарлық кәсіпорындар бюджетке 672,8 млрд теңге пайда әкелген

ПАВЛОДАР. KAZINFORM - Статистикалық деректерге сүйенсек, қазіргі уақытта облыста 62 681 шағын және орта бизнес субъектісі тіркелген.

Ертіс-Баян өңіріндегі шағын және орта кәсіпкерліктердің саны 2024 жылы 3,2 пайызға өскені байқалды. Олардың негізгі бөлігі көтерме және бөлшек саудада (24 262 бірлік), ауыл шаруашылығы, орман және балық шаруашылығында (7 666), көлік және қоймалау (4 957), құрылыста (3 962) шоғырланған.

- Павлодар облысы бойынша мемлекеттік кірістер департаментінің ақпаратына сәйкес, 2024 жылы кәсіпкерлік субъектілерінен бюджетке түскен түсімдер 672,8 млрд теңгені құраған. Кәсіпкерлік нысандарының көбеюіне өңірімізде жүзеге асып жатқан мемлекеттік қолдау бағдарламаларының септігі мол. Біздің басқарма кәсіпкерлікті қолдаудың, оның ішінде пайыздық мөлшерлемені субсидиялау (қарыз алушы үшін түпкілікті мөлшерлеме 8-10%) және несиелер бойынша кепілдік беру (кредит сомасының 50-85%) бойынша қаржы құралдарының өңірлік үйлестірушісі қызметін атқарады,-дейді өңірлік кәсіпкерлік және индустриялық-инновациялық даму басқармасы басшысының орынбасары Дархан Ермағамбетов.

Кәсіпкерлерді қолдау іс-шаралары «Даму» кәсіпкерлікті дамыту қоры» АҚ арқылы іске асырылса, қаржыландыру екінші деңгейдегі банктермен өміршең етіліп отыр.

Бұған қоса облыста әлеуметтік кәсіпкерлік субъектілері үшін мемлекеттік гранттар беру түрінде мемлекеттік қолдау да кең таралған. Грант сомасы 5 млн теңгеге дейін, үміткерлер kezekte.kz сайты арқылы конкурсқа құжаттар жібереді. Конкурсқа қатысушылардың дені - «Бір ауыл-бір өнім» бағдарламасының финалистері және әлеуметтік кәсіпкерлік субъектілері.

- «Ауыл аманаты» жобасы шеңберінде де кәсіпкерлер үшін шағын несиелер беріліп келеді. Несиенің ең ұзақ мерзімі - 5 жылға дейін, мал шаруашылығы саласындағы жобалар үшін – 7 жылға дейін ұзартылған. Ең көп сомасы – 2 500 айлық есептік көрсеткішке дейін. Ал ауыл шаруашылығы кооперативтерін дамыту үшін 8 000 айлық есептік көрсеткішке дейін ресімдеуге болады. Сонымен қатар, 400 АЕК-ке дейінгі гранттар және жастарға 2,5%-бен несие беруге қатысты бағдарламалар да өз кезегімен жүріп жатыр,-деп қосты басқарма өкілі.

Еске сала кетейік, елімізде инвесторларды қолдаудың жаңа тетіктері әзірленді.