Павлодарлық мектеп оқушылары Қ.Сәтбаев атындағы халықаралық олимпиаданың жеңімпаздары атанды

ПАВЛОДАР. ҚазАқпарат - Қазақтың көрнекті ғалымы Қаныш Сәтбаевтың Отаны, Баянауыл ауылында мектеп оқушыларының ІІІ халықаралық олимпиадасы аяқталды. Онда Қазақстаннан, Ресейден және Моңғолиядан 195 талантты балалар математика, физика, химия, ақпараттану және биология бойынша білім сайысына түсті.

Сәтбаев олимпиадасының қожайындары - павлодарлық мектеп оқушылары табысты білім нәтижелерін көрсетті. Командалар арасында дарынды балаларға арналған № 8 мектеп-лицей жеңімпаз атанды, екінші орында да павлодарлықтар - Назарбаев зияткерлік мектебінің оқушылары. Жүлдегерлер үштігінде - Астана қаласындағы дарынды балаларға арналған қазақ-түрік лицей-интернатының командасы.

Облыстық білім басқармасының басшысы Бақыт Бексейітованың айтуынша, олимпиада қатысушылары жоғары білім деңгейлерін көрсетті, 47 қатысушы І, ІІ, ІІІ дәрежелі дипломдармен марапатталды, 8 мектеп оқушысы бірінші орын алды. Жеңімпаздар мен жүлдегерлерге ноутбуктер, планшеттер және ұялы телефондар тапсырылды.

Якутия мен Моңғолия командалары да жеңіске деген жігері үшін бағалы сыйлықтар алды.