Перизат Қайрат пен анасынан қанша қаржы мен мүлік тәркіленді

АСТАНА. KAZINFORM — Елорда соты «Biz birgemiz» қайырымдылық қорының бұрынғы жетекшісі Перизат Қайрат пен оның анасы Ғайни Алашбаеваға үкім шығарды.

Сот үкімімен Перизат Қайрат пен оның анасы Ғайни Алашбаевадан мемлекетке тәркіленген мүлік тізімі және қаржы көлемі:

— «Vela Village» коттедж қалашығындағы жеке үй;

— «Akbulak Riviera», «Sensata Plaza», «Highvill Ishim Gold», «Көк Жайлау» тұрғын үй кешендеріндегі пәтерлер мен автотұрақтар;

— «Mercedes-Benz S450» 2024 ж., «Lexus LX 600» 2024 ж;

— «Rebel Flowers» ЖШС-нің жарғылық капиталындағы 100% үлесі;

— 97 млн теңгеден астам қаражат және 22 мың АҚШ доллары тәркіленді.

— Перизат Қайрат пен Ғайни Алашбаеваның адамдармен алдын ала сөз байласу арқылы бірнеше рет әрі аса ірі көлемде жасалған алаяқтық, сондай-ақ қылмыстық жолмен алынған қаражатты заңдастыру әрекеті жиналған дәлелдемелермен, жәбірленушілер мен куәгерлердің айғағымен, банк құжаттары және заттай толық дәлелденді, — деді Астана қаласы қылмыстық істер жөніндегі ауданаралық сотының судьясы Сабыржан Кәрімов.

Судьяның мәлімдеуінше, алаяқтықтың тәсіл — қайырымдылық жасау мақсатын сылтауратып, жалған қор құру арқылы жүзеге асырылған.

— Бұл әрекет қоғамда қайырымдылық ұғымына сызат түсіріп, азаматтар арасында игі істерге деген күмән туғызды. Істе жеңілдететін мән-жай жоқ. Сотталушылар қылмысты елде төтенше жағдай кезеңінде жасағаны істі ауырлататын мән-жай деп танылды. Келтірілген аса ірі мөлшердегі залал өтелмеген. Осы жайтты ескере отырып, сот бас бостандығынан айыру түріндегі жазаны әділ деп есептейді, — деп қорытындылады судья.

Айта кетейік, сот үкімімен Перизат Қайрат 10 жылға, анасы 7 жылға сотталды. 

Сондай-ақ сот үкімімен Перизат Қайрат пен анасы Ғайни Алашбаева жәбірленушілердің шығынын өтеуге міндеттелді.