Петропавл қаласының кіреберісіне Ботайға арналған монумент орнатылады

ПЕТРОПАВЛ. KAZINFORM – Солтүстік Қазақстан облысында биыл мәдениет нысандарын күрделі жөндеуге және жаңа жобаларды жүзеге асыруға 1 млрд 141 млн теңгеден астам қаражат жұмсалмақшы.

Петропавлда «AMANAT» партиясы жанындағы республикалық «Miras» қоғамдық кеңесінің көшпелі отырысы өтті. Жиын СҚО-ның мәдени мұрасын сақтауға және насихаттауға арналды. 
Облыстық мәдениет, тілдерді дамыту және архив ісі басқармасының басшысы Досбол Әбдіриісовтің мәліметінше, биыл 13 мәдениет нысанын күрделі жөндеу міндеті тұр. Салаға «Ауыл – Ел бесігі» бағдарламасы бойынша 382,1 млн теңге, облыстық бюджеттен 759 млн теңге бөлінген.

- Биыл атқарылар жұмыс ауқымды. Қарасай-Ағынтай мемориалдық кешенінде ғылыми-реставрациялау жұмыстары жүргізіледі. Бұл жоба екі жылдық, 200 млн теңге бөлінген.

Уәлиханов ауданының орталықтандырылған кітапхана жүйесін күрделі жөндеу үшін 150 млн теңге жұмсалады. Айыртау, Мамлют және Жамбыл аудандарындағы мәдени орталықтар да жөнге келтіріледі, - дейді Досбол Әбдіриісов.

Сондай-ақ, Мағжан Жұмабаевтың шығармашылық мұрасын зерттеуге арналған «Мағжан орталығы» жаңа мәдени орталығы ашылады. Бұл мақсатқа 243 млн теңге бөлінген. 

- Ұлттық бірегейлікті нығайту және археологиялық мұраны дәріптеу мақсатында Петропавл қаласының кіреберісінде «Ботай» археологиялық ескерткішіне арналған монументалды ескерткішті орнату жоспарланған. Бұл жобаны жүзеге асыруға 160 млн теңге бөлінді, - дейді басқарма басшысы.

Кеңеске қатысқан «Miras» республикалық қоғамдық кеңесінің төрағасы Аманжол Әлтаев Ботай мәдениетіне ерекше назар аудару қажеттігін атап өтті.

- Ботай қонысынан жеткен жәдігерлерден тартып, өткен ғасырлардан мирас болған мәдени мұраларға дейін ерекше көңіл аударуымыз қажет. Кешегі Бурабайда өткен IV Құрылтайда мен өз тарапымнан бірнеше ұсыныс жолдадым. Соның бірі – арнайы Тұлпар күнін белгілеу. Адамзат баласының тарихындағы Ботай мәдениеті, Ботай қонысы, жылқы түлігін ең алғаш қолға үйреткен біздің ата-бабаларымыз екені дәлелденді. Сондықтан осының басында Қызылжар өңірі тұру керек деп ойлаймын, - деді Аманжол Әлтаев.

Естеріңізге салайық, Астанада Ботай жылқысына ескерткіш орнатылып, ашық аспан астында музей құру жоспарда барлығын жазған едік.