Петропавлда биыл жетім балаларға 120 пәтер беріледі
Петропавл қаласы әкімдігінің мәліметінше, облыс орталығында соңғы 3 жылда сатылған 5 үйден «жетім балалар» санатына жататын тұрғындарға 108 пәтер берілген. Жетім балалар мен ата-ана қамқорлығынсыз қалған балаларға коммуналдық тұрғын үй қорынан немесе жеке тұрғын үй қорынан жергілікті атқарушы орган жалдаған тұрғын үйлердің жалпы санының кемінде 20 % бөлінеді. Биыл Петропавлда барлығы 600 пәтерлі 6 үйді сату жоспарланған, ондағы 120 пәтер осы санатқа беріледі.
Мамандардың айтуынша, «Тұрғын үй қатынастары туралы» Заңның 74-бабына сәйкес тұрғындардың бірнеше санаты мемлекеттік тұрғын үй қорынан үй алуға құқылы. Олар: Ұлы Отан соғысының ардагерлері, жетім балалар және ата-анасының қамқорлығынсыз қалған балалар, «Алтын алқа», «Күміс алқа» алқаларымен марапатталған немесе бұрын «Батыр ана» атағын алған, сондай-ақ бұрын I және II дәрежелі «Ана даңқы» ордендерімен марапатталған көп балалы аналар. Көп балалы отбасылардың бірінші кезекте пәтер алу құқығы бар. Толық ақпаратты 8 7152 46-98-53 телефон нөмірі арқылы алуға болады.
Қазіргі уақытта Петропавлда 253 көпбалалы ана пәтер кезегінде тұр. Ал баспанаға мұқтаж «жетім балалар» санатына жататын тұрғындардың саны - 1774.