Петропавлда бокс ардагерлері арасында халықаралық ашық турнир өтіп жатыр
ПЕТРОПАВЛ. KAZINFORM – ҚР Конституция күні қарсаңында Петропавлда дәстүрлі «Ринг королі» турнирі басталды. Халықаралық жарыстың ерекшелігі – оған жасы отыздан асқандар ғана қатыса алады.
Биыл жетінші рет ұйымдастырылып отырған бұл турнирдің Қазақстанда теңдесі жоқ. Соңғы жылдары оның танымалдығы артып келеді. Биыл алыс шет елдерден де былғары қолғап шеберлері қатысуға тілек білдірген.
Мәселен, «Ринг королі» атағын иелену үшін Израиль мемлекетінің спорт ардагері Михаэль Еди қатысып жатыр. Оның жасы 64-те. Ашық турнир жайында интернеттен көріп, қатысу үшін Петропавлға арнайы келіп отыр.
Кемерево қаласынан келген Сергей Таннагашев — бокстан Ресейдің спорт шебері. Бұл турнирге қатысуға биыл да келіп отыр. Мықты спортшылардың бірі саналатын ол бірнеше рет финалға шықты. Абсолютті салмақ дәрежесінде өнер көрсететін былғары қолғап шебері биыл бас жүлдені жеңіп алуға ниетті.
«Ринг королі» турниріне қатысушылардың бірі - былтырғы күміс жүлдегер Зинат Жандыбаев. Халықаралық деңгейдегі спорт шебері, сондай ақ әскери қызметшілер арасында өткен Әлем чемпионатының екі дүркін чемпионы. 44 жастағы спортшы қазір негізінен балаларды жаттықтырумен айналысады. Петропавлға шақыртумен келді.
Қатысушылар арасында Қырғызстан мен Өзбекстанның бокс ардагерлері де бар, бірақ басым бөлігі – Астана, Алматы, Атырау, Ақтау қалаларының және Қазақстанның басқа өңірлерінің былғары қолғап шеберлері. Олар 63, 69, 75, 91 және +91 келі салмақ дәрежесінде күш сынасады. Жекпе-жек екі минуттан тұратын үш раундта өтеді.
«Ринг королі-2024» атағы үшін финалдық кездесулер 30 тамызда Камиль Сафин атындағы балалар мен жасөспірімдердің бокс мектебінің залында өтеді.
Бұған дейін Дүниежүзілік көшпенділер ойынының ашылу рәсіміне барлық билет сатылып кеткенін жазған едік.
